Waopes vaan Flevoland
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Flevoland is sinds 1 jannewarie 1986 'n provincie, die zès gemeintes tèlt. Ouch de gemeintes zien, op ein nao (Urk), allemaol nao d'n Twiede Wereldoorlog oontstande, sumpel-eweg umtot de groond nui is. De nui gemeintes höbbe euver 't algemein zoonder bedink e waope aongevraog. Tösse 't provinciewaope en vief vaan de zès gemeintewaopes zien euverdudeleke euvereinkomste.
Types waopes bewirk
Alle Flevolandse waopes boete Urk höbbe 't femiliewaope vaan ir. Cornelis Lely opgenome, de bedinker vaan de Zuierziewerke en daomèt de maan boe-aon de provincies en de vief nui gemeintes hun bestoon daanke. Dit waope luit: in lazuur (blauw) 'n (heraldische) lelie vaan zèlver (wit). De lelie kump ouch veur in 't waope vaan de vreuger gemeinte Wieringermeer, neet in Flevoland meh wel deil vaan 'tzelfde plan.[1]
Väöl waopes verwieze ouch direk nao de zie. Um te beginne gelt dat veur Urk: 't dörp waor vreuger bekans exclusief op de vèsvangs aongeweze en dreug daorum 'ne sjelvès in 't waope.[2] De nui gemeintes gebruke dèks heraldische fabelbieste mèt e vèsse-oonderlief en 't bovelief vaan e landbies. In 't provinciewaope vint me 'nen heraldische zieliew (deils oonder water; vergeliek de provincie Zieland), Lelystad heet twie zoe'n zieliewe es sjèldhawwers, Almere keus veur heraldische ziepeerd (zoegeneumde hippocampe). (Vergliek de 'poldergemeintes' Wieringermeer en Eemsmond, boe meerminne 't waope hawwe.) Zeewolde liet zie sjèld daorentege door natuurleke ziehun hawwe. De twie echte peerd in 't waope vaan Dronten valle e bitteke oet de toen. Dat meinde d'n Hoege Raod vaan Adel ouch: heer heet ziech jaorelaank tege de twie sjèldhawwers verzat, tot de Raod vaan Staote de gemeinte geliek gaof.[3]
Provinciewaope bewirk
Op 27 juni 1985, dus al ietot de provincie Flevoland woort ingestèld, stumde d'n Hoege Raod vaan Adel in mèt 't volgend waope, wat bij Keuninklek Besluut vaan 4 juli 't volgend jaor woort verliend:
- Golvend doorsnoje vaan lazuur (blauw) en zèlver (wit) en euver alles heer 'ne (heraldische) zieliew, golvend doorsnoje vaan goud en lazuur, getongk en genageld vaan keel (roed) en hawwend in de rechterveurklaw 'n lelie vaan zèlver. 't Sjèld gedèk mèt 'n gouwe kroen vaan vief blajer en veer perele en gehawwe door twie liewe vaan goud, genageld en getongk vaan keel.[4]
De symboliek is gooddeils bove al oetgelag.
Eine vaan de veurgengers vaan de provincie, 't Opebaar Liechaam Zuieleke IJsselmeerpolders, droog e gegeerd waope mèt hartsjèld en twie ziepeerd es sjèldhawwers, wat noe 't gemeintewaope vaan Almere is.[5]
Gemeintewaopes bewirk
Rifferenties bewirk
- ↑ Heraldrywiki - Wieringermeer
- ↑ Heraldrywiki - Urk
- ↑ Gemeente Dronten - Gemeentewapen
- ↑ Hubert de Vries, Wapens van de Nederlanden. De historische ontwikkeling van de heraldische symbolen van Nederland, België, hun provincies en Luxemburg, Amsterdam, Uitgeverij Jan Mets, 1995: p. 211
- ↑ De Vries (1995): p. 90
| Waopes in Nederlandj |
|---|
|
Drenthe | Euverijssel | Flevolandj | Frieslandj | Geljerlandj | Groninge | Limburg | Naord-Braobentj | Naord-Hollendj | Utrech | Zielandj | Zuud-Hollendj |