Waope van Mofert

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

't Waope van Mofert woort van 5 julie 1817 toet 1991 gebroek dore gemèndje Mofert. In 1991 fuseerdje de gemèndje mit Postert en saer daen tied wuuertj 't waope officieel nimmieë gebroek. 't Waope is waal in Mofert zelf nag hieël populair en is ouch verwirk in 't logo vanne lokaal vastelaovesverein.

Heraldische ómsjrieving

'n Sjildj van lazoer, belaje mit e kestieël mit twieë van kruutse verzene gekanteelde tores, alles van goud, stäöndje oppen toep van 'ne berg of heuvel van 'tzelfde.

Verklaoring

't Waope van Mofert is aafgelèdj van 'ne zegel van de sjaepebank van Mofert. De kluuere lazoer en goud zeen de kluuere van 't Hertogdom Gelder, wo Mofert hieël lang bie gehuuerd haet. 't Kestieël oppe berg symboliseert 't kestieël Mofert, waat ouch op 'ne berg geboewd is.

Gesjiedenis

De zegel vanne sjaepebank

De zegel vanne sjaepebank van Mofert

De sjaepebank van Mofert haet 'ne langen tied, in eder geval toet 1493, geine eige zegel gehad. In 'n stök vanne sjaepebank, oet 't jaor 1493, steit vermeldj det zie zelf geine zegel höbbe en det zie daoróm de sjout verzeuke ziene zegel aan 't stök te hange. Later, in eder gaval in 1614, haw de sjaepebank waal 'ne eige zegel. Aan 'n stök van det jaor hink 'ne zegel, dae d'r es volg oet zuut: 'n Sjild mit 'ne berg, mit dao-op 'n kestieël mit aan edere kantj 'ne gekanteelde tore, mit spits en baovenop edere spits e kruuts. De tores zeen eder van twieë rame verzeen. Inne moer tösse de tores in zit in de midde 'n paort. 't Sjild is ómgaeve door 't randjsjrif “S. Scab. De. Montfort.” Dit is 'n aafkorting van “Sigillum Scabinorum de Montfort” en beteikend “Zegel vanne Sjaepebank van Mofert”.

Aanvraog gemèndjewaope door de Gemèndje Mofert

Op 5 mieërt 1883 besluut 't gemèndjebestuur van Mofert óm 'n gemèndjewaope aan te vraoge bie Keuning Wullem III: “Bij eene regeling en beschrijving van het oud-archief dezer gemeente, waarmede een bekwaam persoon zich in zijnen vrijen tijd onledig houdt, bevinden wij een afdruk van het wapen van het ambt Montfort, thans de gemeente Montfort. Het gemeentebestuur wenscht dit wapen tot gemeentezegel verheven te zien, waarom wij ons tot U.H.Ed.Getr. wenden met het beleefd verzoek ons te willen inlichten welken weg wij te volgen hebben om daartoe te geraken.” Waasjienlik weurd mit dae “afdruk van het wapen van het ambt Montfort” 'nen aafdrök vanne sjaepezegel bedoeld. In det geval klop 't neet gans, waat 't gemèndjebestuur in häöre breef sjrief. 't Geit namelik ómme zegel vanne sjaepebank van Mofert en neet óm 't waope van 't Amb Mofert.

Verlening van 't waope door Keuning Wullem III

Aafsjrif van 't keuninklik beslaot

Op 5 juli 1887 verleent Keuning Wullem III 'n gemèndjewaope aan Mofert, mit de volgende heraldische ómsjrieving: “een schild van lazuur, beladen met een kasteel met twee van kruisen voorziene gekantelde torens, alles van goud, staande op den top van een berg of heuvel van hetzelfde, het schild omgeven door het randschrift Gemeentebestuur van Montfort”.

Wiejer motte veer opmerke, det d'r steit gekantelde torens. Waarsjienlik is dit 'n sjrieffout, ómder 't hie geit óm gekanteelde tores (tores, die van kantele verzeen zeen).

't Sjient det 't waope waas aangevraog mit 'ne berg van sinopel (greun), mer det waerde neet toegeweze.

Gemèndjewaope geit door es dörpswaope

Naodet in 1991 de Gemèndje Mofert op ging inne Gemèndje Postert (later de Gemèndje Amb Mofert) weurd 't waope alein nag gebroek es dörpswaope, mer dan zónger 't randjsjrif.

't Waope van Mofert in angere waopes

Belvend

't Waope van Belvend

't Waope van Mofert kump ouch veur in 't waope van Belvend. 't Hertsjildj in 't waope van Belvend kump euverein mit det van Mofert mit es aafwieking det d'r 'n klok (bel) van zilver in 't hoof van 't (hert)sjildj steit. Belvend haet vreuger bie 't Amb Mofert gehuuerd.

Gemèndje Amb Mofert

In 't Waope vanne veurmalige gemèndje Amb Mofert kump ouch 'n element oet 't waope van Mofert veur. De gekanteelde middelste doorsniejing van 't waope van Amb Mofert kump oet 't Mofers waope.

't Waope es basis veur vereinigingswaopes

't Logo van Koninklijke Fanfare De Vriendenkring

't Logo van Sjötterie Sint Urbanus

't Waope van Mofert kump väöl veur in de logo's en waopes van Moferter vereiniginge, ónger angere bie:

Koninklijke Fanfare De Vriendenkring
Schutterij St. Urbanus: In zwart-wit.
Sportvereniging Montfort '60
Stichting Kasteel Montfort: in dónkerblaw, lichblaw en wit.
Voetbalvereniging Sport na Arbeid "V.V. S.N.A."
Verenigingenraad Montfort: Mit es aafwieking det de berg van kael (roead) is in plaats van goud.