De club woort opgerich op 7 fibberwarie1903 en haet as directe veurgenger de club Valuas. VVV is dus ein van de aldere clubs oèt 't Nederlands betaald vootbal, te vergelièke met AFC Ajax (1900) en Feyenoord (1908). In ein later stadium is ouk THOR(Tot Heil Onzer Ribbenkast), 'n andere alde vootbalclub oèt Venlo, mèt VVV gefuseerd.
Aan 't Nederlands betaald vootbal haet VVV vaanaaf 't begin in 1954 meigedaon. Beej die gelaegeheid fuseerde 't met SC Venlo tot Sportclub VVV '03. VVV waas in de late jaore fieftig 'nne subtopper. Sterspeuler oèt die daag waar de bekinde spits Faas Wilkes. 't Grutste succes waas 't behaole van de KNVB-beker in 1959. Vanaaf 1962 ging 't minder met VVV: in det jaor degradeerde 't nao de Iërste Divisie en inkele seizoene speulde 't zelfs in de Twiëde Divisie. In 1976 promoveerde 't weer nao de Ieredivisie. De decennia daonao ware wisselvallig, met VVV umstebeurt in de Ièredivisie en Iërste Divisie, wies 't in 1994 veur 'ne langen tied degradeerde, met as deeptepunt de achtiènde plaats in 2001. Aan dees periode kwaam in 2007 'n ind, naodet VVV in play-offwedstrièje van RKC Waalwijk wón (2-0 gewónne in Venlo, 1-0 verlaore in Waalwijk, 3-0 gewónne in Venlo) en ten koste van dees club promoveerde. Van 2009 wies 2013 speulde VVV opniej in de Ièredivisie. In daen tièd trok de club boetelandse speulers aan wie Keisuke Honda, Maya Yoshida en Ahmed Musa. Van 2017 wies 2021 speulde de club opnuuj op 't hoeëgste niveau.
