Äöpen houfmenu

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.


VVV traint in De Koel (2009)

De Koel (officieel: Seacon Stadion - De Koel -) is 'n vootbalstadion in Venlo, aan de Kalderkirkerwaeg, det deensdeit es toesstadion van VVV-Venlo. De club speult heej saer 1972, naodet ze 't ald stadion De Kraal, aeve wiejerop, had verlaote. De Koel dank ziene naom aan de lieg ligking van 't terrein. 't Stadion wuurt, ouk door supporters van ander clubs, vuul gepreze um de voetbalsfeer en de alderwètse, karakteristieke oétstraoling, in 't biezónder de trep die de speulers oét de kleidkamer nao 't veld mótte aafloupe. Dees trep stond centraal in 'n mini-documentair van 't tv-program Holland Sport.

In de jaore zeuvetig, wie staonplaotse nog gewuuen waore, kôs 't stadion e groeët aantal luuj bevatte; beej de match taege Ajax in 1977 gaof 't 24.500 supporters. Umdet de eise in 't betaold vootbal strenger woorte - zeker in de Iëredevisie, wao VVV van tied tot tied in speulde - môs me De Koel verbouwe. Nao renovaties in 2003 en 2008 kôs De Koel nog mer 8.000 luuj berge. Daorum ouk haet me saer 'n paar jaor planne veur 'n niej stadion; dit zouw dan in Blierik, in 't Kazernekerteer, mótte koume. Veurläöpig höbbe die planne nog geine vaste vörm. 'n Wiejer verandering is det me saer 2013 op kunsgraas speult; dees beslissing waor gevalle naodet in 't seizoen 2012/13 de grasmat ermelik debeej laog.

Saer 2005 haet 't stadion officieel nao d'n haofsponsor Seacon; d'n alde naom is aevels in de volksmond blieve hange.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=De_Koel&oldid=411223"