VVV–Ajax (2020)

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Venloos, es te dit dialek sjpriks.

De match tösse VVV-Venlo en AFC Ajax in 't Ieredevisiesezoen 2020/21 woort gespäöld op 24 oktober 2020, es oonderdeil vaan de zèsde späölrunde, en indegde in 'n 0-13 euverwinning vaan Ajax. Dezen oetslaag braok diverse binne- en boetelandse records en woort wereldwied in de (sport)peers opgepik.

De Koel, 't stadion vaan VVV-Venlo boe de match woort gespäöld.

Aonluip bewirk

VVV-Venlo waor in 't veurgaonde, aofgebroke sezoen op de daartiende plaots geïndeg. In 't nui sezoen deeg de club 't tot daan touw, gemete nao zien middele, neet slech. Ze had eine kier gewonne, twie kier geliekgespäöld en eine kier verlore. Zeker de wins (oet bij FC Emmen, 3-5) en ei geliekspeul (tege topclub AZ) hadde indrök gemaak. Mèt vief punte en e sletend doelsaldo (9-9) stoont VVV aon 't begin vaan de späölrunde op de negende plaots. Eine speuler kós neet weure opgestèld umtot heer COVID-19 had.[1] Ierste keeper Thorsten Kirschbaum waor geblesseerd; veur häöm stoont Delano van Crooij in de gool.

Veur Ajax leep 't begin vaan 't sezoen iejer wisselend. De club had al ins verlore vaan FC Groningen en mer meujelek gewonne vaan Sparta Rotterdam; in eige hoes späölde ze beter. Heidoor stoonte ze op de twiede plaots mèt e doelsaldo vaan +8 (11-3). Veer daog iejer had Ajax in de Champions League tege Liverpool FC gespäöld (0-1 verlees); veur d'n dinsdag tenao stoont weer 'ne match tege Atalanta Bergamo op 't program. Traineur Erik ten Tag leet daorum diverse vaan zien topspeulers neet speule, of neet de ganse match, en stèlde daoveur speulers op die normaal op de baank zaote.[2]

Um die rei hadde väöl lui 'ne stunt vaan VVV wel veur meugelek gehawwe. Trainer Hans de Koning zag vaan teväöre tot heer "zoe laank meugelek 'ne match devaan [wouw] make".[3]

Verluip bewirk

Bekaans vaanaof 't begin had de match evels 'n einzijeg karakter, boebij allein Ajax aonveel. D'n ierste gool veel in de twelfde menuut en woort gemaak door Jurgen Ekkelenkamp op aongeve vaan Lassina Traoré. Vief menute later veel de 0-2, door Traoré zelf. Traoré, eine vaan de speulers dee normaal reserve stoont meh noe in de basis begós, zouw oetindelek vief kier score en drei kier d'n assis geve.[3] Later in de ierste hèlf leep Ajax oet nao 0-4. Ein vaan de wienege dinger die VVV dao tegeneuver stèlde waor e sjot vaan Georgios Giakoumakis.

Allewel tot Ten Hag in de rös zien stare Dušan Tadić en Nico Tagliafico wisselde, naom de pressie vaan Ajax neet aof. 't Breekpunt kaom in de vieftegste menuut, nao 'n charge vaan Christian Kum op Antony. De sjeidsrechter, Danny Makkelie, gaof iers de geel kaart meh maakde dao roed vaan naotot heer op aonwieze vaan de VAR de beelder trökzaog.

Mèt eine maan mie leep Ajax daonao snel oet. Tösse de 54e en 59e menuut maakde Ajax wel veer gole. Daonao góng 't team door. De 0-10 kaom oet 'n penantie genome door Klaas-Jan Huntelaar, dee kort dao-op ouch nog 'ne veldgoal maakde. De 0-12 kaom neet laank daonao. Inkel menute veur 't ind zat Traoré mèt ziene vijfde goal vaan d'n daag d'n instand op 't bord.

Wie de 90 menute vol waore floot Makkelie direk aof,[4] allewel tot de väöl wissels en 't loere nao de beelder diverse menute verlènging hejje gerechveerdeg.

Details bewirk

Opstèlling bewirk

VVV

Delano van Crooij
Tobias Pachonik
Arjan Swinkels
Chris Kum (  50')
Lukas Schmitz
Evert Linthorst (Stan van Dijck 65')
Danny Post (a) (  18') (Simon Janssen 46')
Zinédine Machache (Yahcuroo Roemer 46')
Torino Hunte (Roy Gelmi 54')
Giorgos Giakoumakis (Wassim Essanoussi 79')
Vito van Crooij

Ajax

André Onana
Sean Klaiber
Perr Schuurs
Daley Blind (Edson Álvarez 70')
Nicolás Tagliafico (Lisandro Martínez 46')
Davey Klaassen
Jurgen Ekkelenkamp
Ryan Gravenberch (Klaas-Jan Huntelaar 70')
Antony (Zakaria Labyad 70')
Lassina Traoré
Dušan Tadić (a) (Quincy Promes 46.)

Opmerking: In dezen tied mochte clubs vief kier in 'ne match wissele in plaots vaan drei kier. Dit kaom umtot de voetbalkalender iejer dat jaor had stèlgelege door de COVID-19-pandemie en noe hiel väöl competities tegeliek lepe. Um de speulers get mie rös te geve besloot me tot deze noedgreep.

Stattestieke bewirk

24 oktober 2020, 16.30
VVV 0 – 13 Ajax
Vinlo, De Koel
Sjeidsrechter: Danny Makkelie
Pebliek: 0
Gole

12' Ekkelenkamp
17' Traoré
32' Traoré
44' Tadić
54' Traoré
55' Antony
57' Ekkelenkamp
59' Blind
65' Traoré
74' Huntelaar (pen.)
76' Huntelaar
78' Martínez
87' Traoré

Balbezit
23% 77%
Sjote
4 (2 op doel) 41 (23 op doel)

Opmerking: Bij de match waor gei pebliek door 't verbod op groete samekomste, 'n maotregel die verband hèlt mèt de COVID-19-pandemie.

Records bewirk

De euverwinning is de groetste dee oets in de historie vaan de Ieredevisie woort behaold. 't Veureg record stoont ouch op naom vaan Ajax: op 19 mei 1972 won dat toen mèt 12-1 vaan Vitesse (mèt oonder mie veer gole vaan Johan Cruijff). De Italiaanse Gazzetta dello Sport merkde op tot 't record zelfs Europese allure had; in de groete Europese competities waor 't in eder geval noets veurgekoume.[5]

't Waor nog neet Ajax zien groetste euverwinning. Die woort in oktober 1984 in d'n Europacup 2 neergezat tege Red Boys Differdange oet Luxembörg (14-0).

't Record vaan groetste euverwinning in 't Nederlands betaold voetbal woort geëveneerd op 3 miert 2023. Dat gebäörde neet in de Ieredevisie meh in de Ierste Devisie, boe PEC Zwolle thoes mèt 13-0 vaan FC Den Bosch won.[6]

Naowèrking bewirk

De match rappeleerde väöl lui aon de 10-0 euverwinning vaan PSV op Feyenoord, op d'n daag aof tien jaor ieder.[3][7] Ouch de vergelieking mèt de match Ajax-Sparta vaan december 1985 (9-0, zès kier Marco van Basten) woort gemaak.[8]

Nao de zèsde runde stoont Ajax bovenaon in de stand, ouch door e verlees vaan de veurege kopluiper PSV. VVV kaom op de veertiende plaots oet.

In de peers waor neve lof veur Ajax veural kritiek te leze. Voetbal International neumde 't team 'dramatisch' en 'zjenant slech',[9] de NOS spraok vaan 'e hölpeloes VVV'.[3] Ouch binne de eige kring kloonk astrein helle kritiek. 't Twitterkenaal vaan VVV hölde ziech vaanaof de 0-9 in zelfspot door 't plekke vaan diverse .gif-filmkes.[10] Arjan Swinkels neumde de match kort nao aofloup "kansloes mèt veer oetroopteikes."[11]

D'n oongewoenen oetslaag woort direk opgepak door de internationaol media, zelfs tot boete Europa. Neve de Gazzetta dello Sport sjreve oonder mie de BBC, El País en de Argentijnse gezèt El Nacion dreuver. Ouch de Britse voetbalcommentator en ex-voetballer Gary Lineker neumde de match. Väöl media neumde ouch de zelfspot vaan VVV häöre sociaolemediamaneger.[12]

In Nederland spraoke diverse lui hun zörg oet euver 't niveau vaan de Ieredevisie, en häör aonzien in 't boeteland.[7] Commentator Hugo Borst stèlde tot de match "rampzaoleg" waor veur 't imago devaan.[13]

De positie vaan trainer De Koning woort neet in vraog gestèld. D'n technischen directeur Stan Valckx neumde 't verlees "'nen oetsjeter" en zag tot de trainer neet op eine match woort aofgerekend.[14]

VVV späölde d'n dinsdag dao-op in de KNVB-beker tege FC Den Bosch, 'n club oet de Ierste Devisie. Dee match won 't mèt 4-2, naotot 't iers nog mèt 0-1 achter waor gekoume. Me constateerde tot de club ziech veurziechteg had herstèld. Ajax traoj in d'n Europese match tegen Atalanta Bergamo es de favoriet aon; 't 2-2 geliekspäöl voont me daorum get teleurstèllend.

Oetindelek woort Ajax mèt groete euvermach kampioen. VVV leek ziech in de volgende maonde te herstèlle, veural door 'n impressionante serie gole vaan topscoorder Giorgos Giakoumakis, meh stortde nao de winterstop gans in. Oetindelek degradeerde de club; dit loot woort bezegeld perceis in d'n oetmatch tege Ajax op 13 mei (3-1 verlees).

Bronne bewirk

Rifferenties bewirk

  1. Nu.nl - VVV-Venlo meldt voor duel met Ajax positieve test bij speler
  2. Nu.nl - Ajax begint met Klaiber, Ekkelenkamp en Traoré aan uitduel met VVV-Venlo
  3. 3,0 3,1 3,2 3,3 NOS.nl - Ajax vestigt nieuw eredivisierecord met monsterzege bij VVV: 0-13
  4. VVV-Venlo - Verslaag
  5. La Gazzetta dello Sport - Vittorie da record: l’Ajax si migliora. In Italia e nel mondo invece…
  6. Nu.nl - PEC Zwolle evenaart Ajax met recordoverwinning van 13-0 tegen FC Den Bosch
  7. 7,0 7,1 Trouw - Historisch record bij VVV-Ajax niet goed voor het aanzien van de eredivisie: 0-13
  8. Nu.nl - Ajax wint met 0-13 van VVV en boekt grootste zege ooit in Eredivisie
  9. Voetbal International - Ajax schrijft bij dramatisch VVV historie met grootste zege ooit
  10. Twitter - @VVVVenlo - Tweet vaan 24 oktober 2020, 17:50
  11. Nu.nl - VVV-Venlo in mineur na recordverlies: 'Kansloos met vier uitroeptekens'
  12. 1Limburg - Van London tot Buenos Aires: 0-13 gaat de wereld over
  13. NPO Radio 1: Oetzending Langs de Lijn 25 oktober 2020
  14. Nu.nl - VVV verwerkt 0-13 met zelfspot: 'We gaan record Ajax zo snel mogelijk breken'
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=VVV–Ajax_(2020)&oldid=464211"