Ravesbösj
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
De Ravesbösj ies 'ne (gedeiltelike) hellingbösj tösje Sjtraobaek-Brokem en Billich in Groat Haasdal. Bovenin en miedenin de bösj haet de Sjtraobaek zien brónne en hie bevinge ziech ouch twiè vieversj. Liègeraaf zal de baek de rand van de bösj volge um later door de beemde van Sjtraobaek in de Geul oet te mónde.
In de hellinge sjtoon veural loufbuim meh aafgewieseld mèt denne. Vanwege 't huègdeversjil vörme ziech euveral gröbbe en haol waeg.
De bösj sjteit ónder toeziech van Sjtaatsbosbeheer.
Tege de Ravesbösj, op 't plateau van Arensgenhout, liek 't gelieknamig (veurmalig) kloaster Ravesbösj van de patersj Heilige Harte. De neogotische kloasterkapel ies gewiejd aan Maria van Vrae. 't Genezend Medium Jomanda veurt hie häör praktijk oet. Aan de weskant van de bösj bevinge ziech de haof Holswick en de veurmalige weuning van de kunssjilder Charles Eyck.
Romeinse tied
bewirk
In de Ravesbösj zint opgravinge gedoon oet de Romeinse tied, zoa-es 'ne Romeinse tempel en 'n aantal Romeinse villa's, woaonder villa Vogelenzang. Die sjpore loupe door tot aan Billich in Haasdal. Ónder aan de bösj, aan de Baeksjtraot, die ziech hie kruus mèt de via Belgica, höbbe ze twiè Romeinse graver gevónge.
In museum 'Het Land van Valkenburg (sjtreekmuseum) in Valkeberg bevingk ziech 'n aantal opgegrave veurwerpe zoa-es: vaze, pöt, bare, kruukskes, sjtökker daakpan, gespe, munte, de dèksel van 'n esjkies en 'n beeldsje.