Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Piet Bours aan 't örgel in de Nuuj Kèrk in Valkeberg.

Piet Bours (Valkeberg, 6 november 1945) ies eine Valkebergse musicus, dae väöl jaore actief ies gewaes es begeleider, dirigent en docent. Hae hèlt ziech väöl bezig mèt kèrkmeziek, 'n tièntal jaore vervulde hae de functie van dirigent-örganis.

Biografie bewirk

Bours woort op 6 november 1945, nét nao ziene twièlingbroor Lei, gebore és 5e kind oet 'n gezin van 6 kinger es zoon van Harie Bours en Anneke Donners. Hae ies opgegreujd op de Heunsberg (nummer 6). Vanaaf zien 7e jaor kreeg hae pianolès. Daoneve kreeg hae later örgel-lès. Nao de middelbare sjoal ging hae nao 't conservatorium in Mestreech en in 1966 volgde ein aansjtèlling es docent piano aan de Valkebergse muzieksjoal, woa hae bienao 40 jaor aan verbonge bleef (de lètste jaore ouch in Mestreech en aan de väöl dependances, onder de naam "Kumulus").

Vanaaf zien 14e jaor, keersjmès 1959, begeleide Piet 't kèrkelik zangkoar St. Caecilia oet Valkeberg (toen nog 'n mannekoar) aan 't örgel, eve later volgde 't begeleide van 't muzieksjoalkoar o.l.v. Guus Bosch.

Hae waor jaorelangk 'ne väölgevraogde begeleider van koare en soliste. Vermeldensweerd ies 't feit dat hae vaste begeleider waor van Wiel Odekerken bie o.a. Zangvereiniging Eendracht oet Sub en Mannekoar Geulklank oet Valkeberg. Bie 't lèts geneumde koar kreeg hae veur miè dan 40 jaor betrokkenheid op 19 november 2011 't beeldsje "de Geulklanker" oetgereik.

Tösje 1968 en 2001 vervulde hae de functie van dirigent-örganis in Valkeberg, ièrsj bie 't St. Caeciliakaor van de Nicolaasparochie, later bie 't Gregoriuskoar van de Slevevrouweparochie. In dees jaore zörgde hae ouch mèt koare, soliste of allein veur väöl oploesteringe van huwelike of oetvaarte. Momenteel ies hae allein nog es örganis in de regio Mestreech en Valkeberg actief.

Ouch énkele koare haet Piet geleid, woa onder 't toenmalige 'Klokkekoar Groat Valkeberg', mèt es hoagtepunt de oetveuring van Hoffmanns Erzählungen van Jacques Offenbach in de Nuuj Kèrk in Valkeberg mèt Marjon Lambriks en Hubert Delamboye.

Nao ièrsj actief te zin gewaes es begeleider, woort Piet op 6 januari 1977 aangesjtèld és dirigent van Zangvereiniging Orphée oet Houtem (Valkeberg). Piet haet bie dit koar de langste sjtaot van deens in häör ruim 150-jäörig besjtoon. Hae sjreef arrangemente, leedsjes en versjkes veur de vereiniging en 't vereinigingsblaad. Bie zien aafsjied es dirigent van Orphée op 22 januari 2017 woort Piet Koninklik Ondersjeie es Lid in de Orde van Oranje Nassau.

Werk bewirk

Bours maakde 'n groat aantal arrangemente van zangpartiture. Ouch sjreef Piet tekste en 'n aantal melodieën, veural veur Zangvereiniging Orphée.

Hae componeerde o.a. de muziek van:

De ièrsjte versie van 't Limburgs volksleed in de Limburgse taal (op de Valkebergse teks van Els Diederen 1996) woort veurzeen van 'n veersjtummige bewèrking veur koar van Piet. Dit sjtuk weurt door Orphée gezonge.

Trivia bewirk

  • Onder 'n pseudoniem haet Piet in 2014 de melodie van 'ne karnevalssjlager gecomponeerd.
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Piet_Bours&oldid=434272"