Jan Notten

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Jan G.M. Notten (Heerle, 2 januari 1935 - Valkeberg, 26 juni 2005) haet in zien leve väöl gepresteerd op ’t gebied van ’t dialek, de volkscultuur en historie in Limburg en in Valkeberg aan de Geul. Van zien vak waor hae Neerlandicus en lièraar Nederlands. Daoneve waor hae ónderzeuker en sjriever euver dialek-taalkundige en historische ónderwerpe. Publicaties in de vorm van brochures, artikele, carnavals-proclamaties en Limburgensia versjene op gereigelde tieje. Ouch sjreef hae artikele, in 't Nederlands en in 't plat in 't regionaal blaad Het Land van Valkenburg ('t Gezètsje) en later in de opvolger Heuvelland Aktueel en in 't kwartaalmagazine Geulrand.

Hae waor veurzieter van ’t Martin Stevensfonds (Bibliotheek van Limburgensia en Valkenburgensia), veurzieter van de 15-februarisjtiechting; penningmeister van de sjtiechting ‘’t Kruus op d’n Tore’, lid van de sjtraotnamecommissie in Valkeberg a/d Geul en jaorelank jurylid van de carnavalsoptochte in Valkeberg.

Notten waor mètopriechter en miè es 25 jaor veurzieter van Veldeke-krink-Valkeberg. De lètste jaore es ièreveurzieter. Hae waor lid van de sjpellingscommissie van Veldeke-Limburg. Jaorelank zoot ‘r in de commissie Veldeke-Literair. In 2004 woort hae beneump tot ièrelid van Veldeke Limburg.

Officieel sjpelling van 't Limburgs

In 1983 versjeen ’t beukske: Aanwijzingen voor de spelling van de Limburgse dialecten, dat nog ummer de basis vörmp van de hudige, oet 2003 daterende officieel sjpelling veur gans Nederlands Limburg.

Publictaties

Zien bekèndste werk dat ies oetgegeve zint opsjtèlle euver de Limburgse dialekte mèt es titel De Chinezen van Nederland (1977. herz. drök 1988).
Ouch waor Jan Notten co-auteur van ‘t gesjiedenisbook van Valkenburg-Houthem. (1979)
1981. Zevenhonderd jaar kerk in Valkenburg, parochie HH Nicolaas en Barbara.
Kijk op Valkenburg
1988 "Beeld van Broekhem" mèt foto's van Jo van Aken
1995. Het Sibber Huis, de geschiedenis van een gebouw en zijn bewoners. Dit book handelt euver 't Subberhuuske in Sub.
Artikel in Historische studies Geuldal jaorbook 2000, pag. 7-34. (ouch es euverdrök/katern). "De eigen taal, Dialecten in het Geuldal".