Oldenzaal

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Ligking vaan Oldenzaal in Euverijssel

Oldenzaal (Twents: Ollenzel, Oldnzel) is 'n stad en gemeinte in de Nederlandse provincie Euverijssel, in Twente, mèt 'n oppervlak vaan 21,98 km² (daovaan 0,39 km² water) en (per 1 april 2016) 32.075 inwoeners. Binne de gemeintegrenze ligke gein ander kerne.

Cultuur

De Sinte-Plechelmusbasiliek in Oldenzaal

In 't katholiek Oldenzaal besteit en (veur 't noorde) oetgebreide vastelaovendstraditie. Ouch regionaol folkloristische gebruke wie kloetsjete en midwinterhorebloze weure hei väöl gepractiseerd. E belangriek monumint is de Sinte-Plechelmuskèrk (zuug heineve), die deils in romaanse stijl gebouwd is en oet de twelfde iew stamp.

Historie

Oldenzaal is in de vreug middeliewe - roond 't jaor 700 - oontstande roontelum 'n börg. In 954 stèlde de bisjop vaan Utrei e kapittel in veur de kèrk die de veurgenger waor vaan de modern basiliek. zoe woort Oldenzaal e regionaol religieus centrum. In 1049 kraog Oldenzaal merretrech. Uterlek twie iewe later - veur 1249 - verkraog de plaots ouch stadsrechte. Aon 't ind vaan de middeliewe krijg de stad e gashoes, e kloester gewijd aon de H. Agnes en maak ze deil oet vaan de Hanze. In de Tachetegjäöregen Oorlog wisselt de stad e paar kier vaan bezètter, meh in 1626 kump ze in han vaan de Staotse legers. Veur de in mierderheid katholieke bewoeners vaan Oldenzaal beteikent dit 'n bezètting, want de stad krijg 'n hervörmde vroedsjap opgelag en de Plechelmuskèrk weurt geconfisqueerd. In 1672-74 is de stad in Munsterse han. Pas nao 1848 maag hei de katholieke religie weer vrijelek oetgeveurd weure. In de negentiende iew kump, wie in gans Twente, ouch hei de textielindustrie op. Vaandaog d'n daag is die zelfs nog neet gans verdwene. Oldenzaal kump in de twintegste iew aon de Rieksweeg A1 te ligke, wat de stad 'nen industriëlen impuls gief.

Gebore in Oldenzaal

• Herman Bode, vakboondsleier
• Ellen van Langen, atlete
• Mieke Telkamp, zengeres
• Jan Vennegoor of Hesselink, vootballer

Externe link

• Website vaan de gemeinte