Hengelo

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Dit artikel geit euver de gemeinte in Euverijssel. Hengelo is ouch e dörp in de Gelderse gemeinte Bronckhorst.

---

Ligking vaan Hengelo in Euverijssel

Hengelo (Twents: Hengel) is 'n plaots (versteidelek dörp) en gemeinte in de Nederlandse provincie Euverijssel, in Twente, mèt 'n oppervlak vaan 61,78 km² (daovaan 0,72 km² water) en (1 april 2016) 80.990 inwoeners. Neve de hoofplaots umvat de gemeinte nog 't kèrkdörp Beckum en de naobersjappe Oele en Woolde.

Historie

Hengelo oontstoont roond d'n Hoof (te) Hengelo, die huurde bij de naobersjap Woolde, en de bijgelege kepel. In de zestiende iew bouwde Frederick vaan Twickel hei zie Hoes Hengelo. Dit woort in 1821 gesloop. Bij 't stiechte vaan de gemeinte Hengelo in 1802 waor de plaots nog neet mie es e boeredörp vaan hoonderd boerehäöf en daagloenershuiskes. De plaots greujt enorm mèt de koms vaan de textielindustrie, en, vaanaof 1859, de machinebouw (Stork). Door 't strategisch belaank vaan de industriestad bombardeerde de geallieerde de stad mie es eine kier. In 1944 woort 't centrum haos hielemaol eweggevaog. Dit bombardemint en de slopershamer höbbe wieneg euvergelaote vaan de negentiende-iewse stad. Ei vaan de wienege euvergebleve gebouwe is de Lambertuskèrk oet 1890. Wel 't opvallendste gebouw is 't nui raodhoes, mèt d'n hoegen torie. In 1992 stortde 'ne F-16 vaan de Vleegbasis Twente neer op de nuibouwwiek de Hasseler Es. In de jaore negeteg kaom mie es eine kier de discussie op euver 'n fusie tösse Enschede, Hengelo en Borne. De bevolking is dao in groete mierderheid tege; um die rei zien zoe'n planne weer in de ieskas gezat.

Externe link

• Website vaan de gemeinte