Oas (Valkeberg)

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

---

De nuuj kèrk

Oas (Nederlands: Oost) ies 'n wiek in 't noord-oaste van Valkeberg en ten oaste van 't veurmalig gehuch Sint-Pièter. De naam kump van 't gelieknamig kesjtièl Oas, dat hie 't gebeed in eigendóm haet gehad. 't Kesjtièl liek in de Oastergats. Dao tegeneuver liek de Sjaatsberg mèt aan de voot 'ne kalkove en 'n "Auvermennekeslook" in de mergelberg. De Oastergats ies 'ne ouwe weeg vanoet Sint Pièter riechting Sjin op Geul. Hauverwaegs kump me langs 'ne mergele calvariegroep, besjtaonde oet 2 kapelkes en 'n calvarie, De drie Beeldsjes geneump.

In de jaore nao de Twiède Waereldoorlog óntsjteit hie, in de beemde van de Geul, 'n groate woonwiek besjtaonde oet de sjtraote: Burgemeister Henssingel, Pestoar Sartonsjtraot, Oasterbeeksjtraot, Thibaltsjtraot, Louis Eliassjtraot, Berkelplein, van Tilsjtraot, Dr. Hermansjtraot. 't Gevolg ies dat de parochiekèrk van Valkeberg te klein weurt. In 1955 weurt 'n nuuj parochie opgeriech. De garage van Hotel Palanka, aan 't Walramplein, deent tot 1960 es noadkèrk. In 1961 ies de nuuj parochiekèrk, gewiejd aan Slevevrouw van ummerdoerende biesjtand, vaerdig. De architect van 't modern, veurnamelik, mergele boewwerk ies Theo Boosten oet Mestreech. Bie de restauratie van de kademoere aan de Geul in 2009, krieg de kèrk eindelik, de al in 1960 geplande, vootbrök euver de Geul nao de besjtaonde hoofingank.

In de beemde liegke de sjportvelde van Valkeberg, de verpleegkliniek Valkenheim en 't hertepark aan de Geul.