Nuie Mestreechsen Dictionair
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Nuie Mestreechsen Dictionair (NMD) is, zoe es de titel al zeet, de Nuien Dictionair veur 't Mestreechs Limbörgs, in tegestèlling tot de "Endepols", dee weurt gezeen es D'n Awwe Mestreechsen Dictionair. D'n dictionair woort veur 't iers in 2001 oetgegeve. D'n dictionair is sinds 18 november 2014 gans opgenomme in d'n digitaolen dictionair Mestreechter Taol (mestreechtertaol.nl). Dees website is ouch erkènd door Veldeke (vereineging) es d'n officiëlen opvolger vaan de NMD. In miert 2015 wón mestreechtertaol.nl de Europese Language Industry Award in de cattegorie 'Bèste Taolwebsite'. Mestreechter Taol weurt dèks aongevöld mèt nui wäörd boedoor de pepèrre NMD al gauw is verawwerd. 't Is neet klaor of de NMD oets nog 'ne nuien drök zal oondergaon. Dit is mèt de lancering vaan Mestreechter Taol minder aonzeenlek gewore.
Gesjiedenis
bewirkIn 1976 kaom Gaston Chambille bij Twajn Minis en Pol Brounts mèt de vraog of ze zin hadde um mèt te wèrke aon 'ne nuie Mestreechsen dictionair. Alle drei hadde ze väöl respek veur 't werk vaan dr. Endepols, dee in 1955 'nen Diksjenaer (zoe es toen Dictionair woort gesjreve) had oetgegeve. Meh väöl lui klaogde um 't feit tot Mestreechse en Nederlandse trefwäörd doorein stoonte, wat 't opzeuke umslachteg maakde. Ze beslote mèt hun dreie aon de geng te goon. 't Groetste versjil tösse de twie beuk zouw 't punt zien tot de Nuie Mestreechsen Dictionair zou weure verdeild oet twie stökker: ei Mestreechs en ei Nederlands. Ouch beslote ze tot 't Mestreechs deze kier in de Veldeke-spelling zou weure gesjreve. Veur de lui boete Limbörg zou 't ouch mekkeleker weure, want weijer waor 't vaan groet belaank tot 'ne lezer wèt wie e woord moot weurde oetgesproke.
In 1987 kaom Miek Simais helpe bij 't systematisch rangere vaan de hoonderde keertsjes mèt trefwäörd. In 1991 kaom Joop Kurris in de plaots vaan Twajn Minis bie de redactie. Neet laank daonao is Minis gestorve. Leon van Neer waor toen al bezig mèt ziene ordinatäör: heer verzörgde d'n opmaak. In 2001 steerf Chambille en Harry Paulissen woort touwgeveug.