Nètmaag
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
(m. sloekderm); v. pens; n. nètmaag; b. bookmaag; l. lebmaag; (i. twellefvingerigen derm).
De nètmaag (Letien: reticulum) is d'n twieëdje vanne veer mage van herkawwers. Deze maag wuuertj zoea geneump, ómdet de wandj van deze maag op e vèsnèt liek. De nètmaag vörmp e gehieël mitte pens. Inne nètmaag ligke zowaal d'n ingank vanne sloekderm es d'n oetgank nao de bookmaag. De nètmaag is e wichtig orgaan veur 't verveur van 't voor inne veurmage. Door zich te óntspanne zuug de nètmaag klein voordeilkes aan, dewiel bie 'n sametrèkking voordeilkes en vleujstof via de bookmaagäöpening waeren aafgeveurdj of oppernuuj euver 't voor inne pens wuuertj gegaote. De nètmaag speeltj ouch 'n rol bie 't vörme van 'nen herkawbolus, dae via d'n ingank vanne sloekderm dao-in wuuertj trögkgeduujdj. De sloekderm verveurtj d'n herkawbolus daonao nao de móndjhaolte wo 't voor oppernuuj gedoerendje zoeaget 1 menuut wuuertj gekawdj.