Mae Marsh
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Mae Marsh (gebore es Mary Wayne Marsh, 9 november 1894[1] in Madrid, New Mexico, dus neet de Spaonse hoofstad – 13 fibberwarie 1968 in Hermosa Beach, Californië) waor 'n Amerikaanse actrice, veurnaomelek in geluidloeze films, mèt 'n carrière vaan mie es viefteg jaor.
Marsh begós bekindheid te kriege door klein röllekes in films vaan de regisseur D.W. Griffith. Later leet zie in interviews weite tot Griffith neet allein häör mer bekans ederein behandelde es vie.[2] Zie brook pas ech door door häör ról es oonsjöldege zöster in Griffiths bekinste film The Birth of a Nation oet 1915. In de film dee dao-op volgde, Griffiths Intolerance (1917) späölde zie de vrouw vaan wee 't keend woort aofgepak naodat häöre maan oonterech de gevaangenis in mos.
Nao 't succes vaan Intolerance teikende zie e lucratief contrak vaan de regisseur Samuel Goldwyn boe-in zie 't gigantisch salaris vaan 2.500 dollar zaw kriege per week. Oetindelek bleek gein vaan die films succesvol te zien en de deal heelt gauw op. Naodat zie trouwde mèt Lee Arms, 'ne manager vaan Goldwyn, in 1918 begóste 't aontal films boe-in zie speulde te daole nao gemiddeld eine per jaor. Ze speulde nog in 'n aontal films, oonder mie weer veur Griffith, mer bekans alle mislökde financieel. Häöre lèste film, The Rat (1925), waor evels e groet succes.
Mèt Lee Arms kraog zie drei kinder. Zie bleve häör gans leve getrouwd. In 1968 hiemelde zie in 't Californisch stedsje Hermosa Beach mer woort bezörg in Redondo Beach, wat dao kortbij ligk. Häöre maan hiemelde pas in juni 1989, wie heer 101 jaor aajd waor. Heer woort neve häör bezörg.