Houtkook

(Doorverweze van Drop)

Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.


Houtkook, lakrits of drop

Houtkook (of Lakrits, ouch waal krissie of krissekes) is ein in sómmige deile van Limburgs gebruuk woord veur ’t Nederlandse drop. 'ne Andere dropvariant hèt ketteke (katjesdrop)

Wiej wirt 't gemaak bewirk

Houtkook wirt gemaak van de wortel van de zeuthoutsjtroek. Dit is eine subtropische sjtroek dae greujt in de Zuud-Europese lenj es Italië, Griekelandj en Turkije en mèt name ouch in China. Went de sjtroek geoags wirt waere de wortele hiejvan gedreuëg en daonao in sjtökskes gesjneje. Die sjtökskes waere vervolges gekaok tot eine dikke pap. De pap wirt in bakke aafgekeuld wonao de zoagenaamde blokdrop (kook) is verkrege. Vandao de Limburgse benaming houtkook.

De blokdrop wirt vermenk mèt zètmael van aerpel of maïs dat de drop soepel maak. Vreuger gebroekde me hiejveur Arabische gom, de harsj van de acaciaboum. Veur de zawte sjmaak wirt salmiak gebruuk. De zjwarte kleur van de drop wirt verkrege door norit in 't mengsel te doon. Veur broene drop gebruuk me hiejveur caramel. Anger kleure waere gekrege door kleursjtoffe te gebruke. Óm de drop eine bepaolde sjmaak te gaeve waere sjmaaksjtoffe es biejveurbeeld honing, anies, eucalyptus, paepermuntjaolie, menthol toegevoog.

Sjuumke trèkke bewirk

Vreuger woort houtkook of lakrits door de kènjer in ein, hawf mèt water gevöld flesjke gedaon, eine sjtop d’r op en dan mèr sjöddele. Es me lang genóg sjöddelde góng d’r in de flesj sjoem óntsjtaon. Dae sjoem koosj me dan mèt de móndj door de flesjehals aafzuge, 't sjuumke trèkke. Me neumde dit dèkser houtkokebeerke.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Houtkook&oldid=240094"