Konrad Adenauer

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Konrad Hermann Joseph Adenauer (5 jannewarie 1876, Kölle - 19 april 1967 in Rhöndorf) waor d'n ierste boondskanseleer vaan de Boondsrippebliek Duitsland vaan 1949 bis 1963, zoe-ouch d'n ierste fidderaole minister vaan Boetelandse Affaires vaan 1951 bis 1955 en d'n ierste partijleier vaan de CDU. Door zien inspanninge veur d'n aonveng vaan 't Europees integratieperses, weurt Adenauer gezien es eine vaan de 11 founding fathers vaan de Europese Unie (EU).

Es advocaat en lid vaan de Katheliek Centrumpartij had heer al 'n succesvol polletiek carrière in 't Duits Riek en de later Weimarrippebliek: heer waor börgemeister vaan Kölle, betaompde tot 't Pruusj landhoes en waor veurzitter vaan de Pruusje Staotsraod. In d'n tied vaan 't nationaolsocialisme (Nazisme) woort heer oet zien amb oontheve en tijelek gevangegezèt.

Adenaur waor eine vaan de opriechters vaan de CDU: de christendemocratische partij die op EU-niveau bij de Europese Volkspartij huurt. Heer waor vaan 1950 bis 1966 partijveurzitter vaan de CDU. Es veurzitter vaan de parlemintaire raod en es d'n ierste boondskanseleer en minister vaan Boetelandse Affaires vaan Duitsland heet heer 'n gans periood vörmgegeve. Heer waor al 73 jaor aajd wie heer aontrooj mer had 'n groet invlood op de Duitse hervörming. Heer zörgde d'r veur tot Bonn de fidderaol hoofstad woort, heer stoond veur 'n polletiek vaan integratie nao Europese einweurding en hher steunde 'nen actieve rol veur de Boondsrippebliek in de NAVO. In terme vaan ikkenomisch polletiek stoond Adenauer veur 't systeem vaan de sociaol merretikkenemie. Heer waor 'ne groete tegestender vaan communisme, zoewie in zien eige land wie in zien geopolletiek contra de Sovjet-Unie.

Zuuch ouch

Brón

Dit artikel is groetdeils direk vertaold oet de Duitstaolege Wikipedia