Katsep

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Aelses, es te dit dialek sjpriks.

---

Katsep (Nederlands: Catsop) is 'n gehuch van Aelse in de gemeinte Stein in Zuud Limburg in. 't Gehuch ies gelege tösje Baek en Aelse. In de 14e ièw leze v'r Kaytsappe en Catsop. In 1840 sjteit Castrop gesjreve. Miede in 't dörp liek de Dreesj, 'n drieheukig plein, woa vreuger 'ne waterpool gelege haet um 't viè te laote drinke. Dat weurt noe aangegeve mèt 'ne beeldegroep van helsjtein.

Mariakapel oet 1848 en Katseperhaof

Gesjiedenis

• Op de Hyscheber in de bösj De Horst zou 'n kamp ingeriech zin, woavan de vestingwalle en grach van ca 6 maeter breid noe nog te óndersjeie zint. De Noormanne houwe in de buurt van Aelse aan 't ing van de 9de ièw 'n kamp van woa oet ze hun sjtruiptochte óndernomme. Ze zint verdreve door de keuning van Oos-Francië Karel de Diekke.
• De sjtraotnaam Op de Dreesj kump van dreesjpool, de plek woa 'ne drinkpool laog veur 't viè.

Bezeenswaerdig

• Riechting Gäöl löp 'ne holle waeg.
• Op 't ing van de Daalsjtraot sjteit aan de ouwe weeg, de hièrsjtraot van Remung nao Mestreech, miedde op 'n krusing de Mariakapel oet 1848, die geboewd ies op de plek woa 'n kapel in de Mieddelièwe haet gesjtange. Tegen 't plafón van 't geboew ies de legende van de heilige Philippus Winandus oet Klein Maes gesjilderd, dae op weeg nao Jeruzalem, door 'ne ingel op 'n peerd in eine daag nao heim (de plaats van de kapel) zou zin truukgebrach. In 1998 haet restauratie plaatsgevónge. De kapel weurt 't Bluuske geneump, 'n sametrèkking van bel en huuske. Op 't geboew kapel sjteit e klokketeurentsje. De bel fungeerde es alarmbel in tieje van gevaor en brand.
• In de buurt van de kapel sjteit de "Katseperhaof" oet 1150.
• Aan de Schuthagenwaeg liek de Hagenhaof.