Isabel dos Santos
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Isabel dos Santos (Bakoe, 20 aprèl 1973) is 'n Angolese zakevrouw. Ze is de dochter vaan de vreugere president José Eduardo dos Santos, dee 't land vaan 1973 tot 2017 regeerde, en dee zien Russische vrouw Tatjana Koekanova. In de jaore '90 góng ze studere aon 't King's College in Londe. Hei trof ze häöre maan Sindika Dokolo oet Zaïre, daan al 'ne miljonair. Nao häör studie begós ze zelf te oondernumme. In de Angolese hoofstad Luanda zat ze tal vaan bedrieve op en ouch in diverse Europese bedrieve, veural in Portugal, had ze e belaank. Door häör successe en 't mechteg nètwerk woort ze de riekste vrouw vaan Afrika. In 2013 woort häöre riekdom al op twie mieljard dollar gesjat, boemèt ze de ierste vrouweleke dollarmiljardair oet Afrika woort. De BBC beneumde häör in november 2015 tot ein vaan de hoonderd mechtegste vrouwlui op de wereld.
Vaanaof 't ind vaan de jaore tien evels woort ze verdach vaan groetsjaolege fraude. Ze zouw ziech door corruptie zwoer höbbe verriek, neet in de lèste plaots mèt geld wat veur oontwikkelingshölp en aander projekte veur de bevolking waor bestump. Op 30 december 2019 leet 't Angolees preventief beslaag lègke op häö rekeninge en die vaan häöre maan; umtot dat väölal in 't boeteland waor gestald, mundde dit oet in 'ne laankdorege proceduur mèt rogatoir opdrachte. Op 19 jannewarie 2020 woort e rapport oetgebrach euver de oetgebreide corruptie boe zij en lui oet häöre krink bij waore betrokke, de Luanda Leaks. Veer dago later, op 23 jannewarie, woort Dos Santos formeel in staot vaan besjöldeging gestèld.
Dit artikel is e sjtumpke. De kans Wikipedia helpe door 't aan te völle