Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


Bekièring van Hubertus op de gevel van de Hubertuskapel van 't kesjtièl van Amboise. In de kapel liek de Italiaanse kunstenaer Leonardo da Vinci begrave.

Hubertus van Luuk (Welsj Hoeber) (rónd 655 - 30 mei 727 of 728) waor biesjop van Mestreech en Luuk. Hae ies de petroanheilige van de jach, van de Ardenne en tege hóndsdölheid. Ziene fièsdaag ies op 3 november. Op deze daag begint ouch 't jachseizoen, dat tot april zal doere.

Leve bewirk

Hubertus kaom oet 'n rieke familie. Hae waor de opvolger van Lambertus van Mestreech es biesjop van Mestreech en Tóngere. Umdat die plaatse allebei neet veilig waore verplaatsde hae de biesjopszetel en de relieke van ziene vermaorde veurgenger nao Luuk. Vanoet die plaats deeg hae missiewerk in Brabant en in de Ardenne. Nao ziene doad woort Hubertus opgevolg door ziene zoon Floribertus (in daen tied mochte getrouwde mansluuj nog geistelike were). Zien lichaam woort in 825 euvergebrach nao Saint-Hubert, dat doe e bedevaartsoord woort. Al in de 9de ièw waor Hubertus de besjermer van de jagersj in de Ardenne en brachte ze häöm hun ièrsjte buut, zjuus wie ze die hónderd jaor ièrder aan Diana en nog ièrder aan Arduinna offerde. [1]

Hubertusbroad bewirk

Hubertusbroad ies gewiejd broad, dat gezegend weurt op de fièsdaag van de heilige op 3 november.

Kèrke en kapelle gewiejd aan Hubertus in Limburg bewirk


Legende bewirk

 
Kèrk van Saint-Hubert

Wie Hubertus op Goje Vriedeg góng jage ('t waor neet gepas um dat te doon op daen daag), zoog hae 'n groat hert. Wie hae korter bie kaom en 't wol neersjete zoog hae tösje 't gewei van 't hert 'n leechgevend crucifix. 'n Sjtum zag häöm e beter leve te goon leie en nao Lambertus in Mestreech te goon. Hae góng daoheen en Lambertus zou ziene spirituele leraar were.

Van Petrus zou Hubertus 'ne sjleutel gekrege höbbe woamèt hae hóndsdölheid koes geneze. Deze sjleutel zou ouch nao de doad van Hubertus zien krach behouwte höbbe.

Veurname bewirk

Veurname die aafgeleid zin van Hubertus: Hoebaer, Baer, Bèr, Bert, Huub, Hub, Bertus


De volgende sectie van dit artikel is gesjreve in 't Norbiks.

Gebaoërte en sjterfplaatsj bewirk

Volges de legende is Hubertus gebaore in Toulouse en gesjtorve in Tervuren. Över de gebaoërteplaatsj van Hubertus is in de bronne evvel gèng dudelekhèèd. Toulouse en Voere werre geneumd. [2] Ooch över de sjterfplaatsj van Hubertus zeunt twiefels. Z'n sjterfplaatsj wert in versjillende vita's Fura of Vura geneumd. Daovan wert algemèng aangenómme dat 't Tervure is. Oet 'n besjouwing van d'r Heemkundige kring van Tervure, op groond va archeologisch en kultuur-historisch ónderzeuk, bliekt dat me dao miegt dat mèt Fura Voere gemiengd is en dat Hubertus dus dao, en neet in Tervure, gesjtorve is. Opvallend daobie is waal dat d'r twiefel in de twieë gevalle in de richting va Voere wiest.

Referentie bewirk

Externe leenk bewirk

 
Commons
Op de pazjena Hubertus van Wikimedia Commons zeen media gerelateerd aan dit óngerwerp te vènje
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Hubertus&oldid=438936"