Gans op de wies va Visé
Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Gans op de wies va Visé is e Belsj sjtrieëkgerech oet Visé oeë 't hieël väöl recepte va zów ha. 't Origineel zów zelfs geheim zieë en bewaard waeëre dör 'n broedersjap. Mètstens wert 'n gans gevöld aeëte, zoewie in Duutsjlaand de Weinachsgans of de Seent-Maeërtensgans, die mèt kaeërsjmès of Seent-Maeërte werre gaeëte. De gans va Visé wert evvel neet gevöld mae gekaoëkd, gemarineerd in de èges getrókke breuj, gepaneerd en in 't ège vèt gebakke en da mèt 'n werm knoflook-roomsaos opgedènd.
Ingrediaente
bewirk- 1 dieke hoesgans va ca. 3500 g. De hoesgans is de taam gans, gefókt oet de grów gans (Anser anser)
- 3 sjtengele sjpaoër
- 3 moeëre
- get tekskes sèlderie
- 2 unne
- 4 à 6 tieëne knóflook (nao sjmaak)
- 3 èèjdäöere
- 200 g room
- 150 g bótter
- paneermael
- paeëper
- zaot
Wie makt me de gans pres?
bewirkMaak de gans sjön, doeg 't vèt d'r van aaf of laot dat doeë. 't Vèt en d'r laeëver ooch beware. Doeg de gans en d'r laeëver in 'n groeëte pan mèt 'n driej liter kaod water en laot alles op e matig vuur waerm waeëre. Es 't kaoëkt, 't sjpaoër, de unne, moeëre en d'r sèlderie d'r bie. Kruje mèt paeëper en zaot en driej oor sjtillekes laote kaoëke. Laot da alles afkeule en laot de gans in de breuj 24 oor op 'n keul, duuster plaatsj trèkke.
D'r daag d'r óp: Sniej de gans in sjtökker en haol zoeväöl mäögelek knäöek d'r oet. Vrief de sjökker gans väörzichtig druuëg. Sjmèlt 't ganzevèt op e klèè vuurke. Dat doort 'n 20 minute.
Maak oondertössje de saos: kwètsj de sjöngemakde knoflooktieëne in e penneke en doeg dao op gaans klèè vuur bietsje bie bietsje de gesjmoolte bótter bie. En daonao de lósgeklópde èèjdäöere. Reur good mèt 'ne hóte laeëpel bies 'n fieng saos oontsjtèèt. Doeg da oonder good reure d'r room d'r bie. Brèng de saos óp sjmaak mèt paeëper en zaot en haow ze waerm (evt. au bain-marie).
Besjtruj de sjtökker gans mèt paneermael en doeg ze in 't hèèt ganzevèt. Tèl op 10 minute öm de sjtökker te werme en 'n fieng broen kleur te gaeve.
Liek de sjtökker gans op 'n sjóttel en serveer de saos d'r bie. D'r bouillon kan me, good gewermd, d'r bie ópdene.