Euversjtruiming in Miedde-Europa (2021)

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.


't Óndergeloupe centrum van Valkeberg

De euversjtruiminge in juli 2021 treffe groate deile van Miedde- en Noardwes-Europa. Zie zin 't gevolg van zjwaore regeval en woorte veroerzaak door e liègedrökgebeed dat dagelank op zien plaats bleef. Revere en baeksjkes sjtruimde euver en riechde boetegewoon väöl sja aan in deile van de Eifel, 't Rienland, de Ardenne en 't Heuvelland. In 't Heuvelland woort veural 't sjtedje Valkeberg hel getroffe door de watereuverlas. Op 't Belsj en in Duutsjland vele doaje.

OarzakeBewirk

Saer 12 juli zörg e occlusiefront bove 't weste van Duutsjland veur aanhoutende regeval.[1] De loch róndum 't liègedrökgebeed woort constant veurzin van verdampingsvoch oet Centraal-Europa en dat veel oeteindelek weer nao ónder es rege. In e groat gebeed van Sakse bies Noordoas-Frankriek en Luxemburg bies Limburg veel 100 bies 200 mililiter rege in sjlechs drie daag tied. In de buurt van Haerle en Voelender veel 86 bies 98 liter per veerkante meter in 24 oer tied.[1] Doordat baeke en revere al dat water neet in eine kièr kóste aafveure, goof 't op väöl plekke euversjtruiminge. 't KNMI goof um dees rae code oranje en road aaf veur de provincie Limburg.[1][2][3]

Volges klimaatweitesjappersj geuf 't e verband tösje de euversjtruiminge en de opwerming van de aerd. Doordat de loch wermer ies, hèlt zie miè voch vas, woadoor de kans op zjwaore regeval en euversjtruiminge toenump.[4]

Sja en sjlachoffersjBewirk

 
Hoagwater in Mesjtreech, ziech vanaaf de Sint Servaosbrögk

NederlandBewirk

Boete Limburg haet 't noadweer gein neumeswaerdige sja aangeriech. In Noord-Braobant raakde hie en dao 'ne diek verzjwak en woorte noaddieke aangelag aan de Maas.[5] Bie Hattem brook de diek tösje de Iessel en 't Apeldoorns Kanaal.[6]

Nederlands LimburgBewirk

Veural 't zude van de provincie waor hel getroffe. Zjwaore regeval op 13 en 14 juli veroarzaakde euversjtruiminge en watereuverlas in deile van de Oastelike Miensjtreek en 't Heuvelland.[7] Op 14 juli waor e gedeilte van de A76 bie Zumpelveld óndergeloupe.[8] D'n anderen daag is ouch de A2 bie Meersje in bei riechtinge aafgesjlote gewaore[9] en sjtónge deile van de A79 bie Haerle ónder water.[10] Wiejer goof 't sja aan 't sjpoor tösje Èèsjde en Luuk.[11]

Dezelfden daag woorte deile van 't sjtedje Valkeberg geëvacueerd door 't leger umdat de Geul euversjtruimde, sjtraote en hoezer ónderlepe en luuj zónger sjtroum kaome te ziette.[12][13] De watereuverlas had veural sja aangeriech in 't centrum. Ónder ander e museum en 'n kèrk sjtónge ónder water.[14] Volges Daan Prevoo, börgemeister van Valkeberg, haet de gemeinte zo'n 400 mieljoan euro sja geleje en kinne 700 gezinne neet truuk nao hoes.[15] Ouch 't water in de Maas zoa hoag dat de Mesjtreechse wieke Heugem en Randwiek en versjèllende dörper aan de reveer woorte geëvacueerd.[16] Daen daag woorte ouch evacuaties aangekondig in Remung en de gemeinte Ech-Zöstere[17] en brook de diek van 't Julianakanaal bie 't Voelwames, wat väöl sja had veroarzaak aan de hoezer van de inweunersj van Bung en Gäöl.[18] In Venlo woort 't VieCuri-krankehoes geëvacueerd en aan 't begin van d'n aovend woorte deile van de sjtad en de umliegkende dörpkes óntruump.[19] De inweunersj van 't dörpke Wel in de kop van Noord-Limburg woorte op 16 juli ouch opgerope tot evacuatie. De watereuverlas in dees contreie bleef oeteindelek beperk.[20]

DuutsjlandBewirk

 
Besjadig sjpoor in Urft kórtbie Schleiden

Groate deile van Midde- en Zuud-Duutsjland waore hel getroffe door heftige regeval en watereuverlas. Meistal bleef de sja beperk tot óndergeloupe keldersj of aafgezatte waeg. In totaal zint miè es 170 doaje te betreure. Wiedoet de meiste sjlachoffersj vele in de distrikte Euskirchen (NRW) en Ahrweiler (RPF).

Noordrien-WesfaleBewirk

Miedde juli zörgde de hevige regeval veur watereuverlas in versjèllende gemeintes in 't weste van dizzen deilsjtaot. De watereuverlas concentreerde ziech veural in 't zude en zuudweste, dus in de umgaeving van Kölle en Bonn en deile van de Eifel. Zoa veel in Kölle-Stammheim binne 24 oer miè es 150 liter neersjlaag per veerkante meter. Hel getroffe waor 't dörp Blessem in de gemeinte Erftstadt. Dao trooj de Erf, 'n ziereveer van de Rien, boete häör oeversj, waodoor mièrder hoezer door de krach van 't water insjtortde.[21] In Kirchheim, get ten zude van de sjtad Euskirchen, móste doezende beweunersj geëvacueerd were, umdat 'ne sjtuwdam dreigde door te breke. Dat is oeteindelek neet gebeurd,[22] meh in Kreis Euskirchen had 't noadweer väöl sja en sjlachoffersj veroerzaak. Zoa woorte in Bad Münstereifel talloze historische vakwerkhoezer verwoes.[23]

Neet allein in Euskirchen en umgaeving goof 't euverlas. Ouch in ander Kreise maakde 't hoagwater sjlachoffersj. Zoa vele in Jellekerke twiè doaje in 'nen óndergeloupe kelder.[24] Wiejer móste doezende luuj hun hoezer verlaote. Dat gebeurde bieveurbeeld op 16 juli in Ophaove,[25] neet wied van Wasseberg. Op 20 juli woorte hónderde luuj in 't Bergsje Leichlingen geëvacueerd.[26]

In de regio róndum Bonn, Hagen en Wuppertal woort 't treinverkièr sjtilgelag. Sommige waeg waore óndergeloupe. Veural op de A1 en A61 leide de watereuverlas tot groat óngemaak.

In Noordrien-Wesfale zin 47 luuj gesjtorve es gevolg van de heftige euversjtruiminge.

Rienland-PaltsBewirk

 
Hoagwater in Altenahr

In Rienland-Palts concentreerde zich de euverlas in 't distrik Ahrweiler, get ten zude van Bonn. Dao veel op sommige plekke 147 liter rege en woorte dörpkes langs 't reveerke de Ahr verras door 't hoagwater.[27] Allein al in 't dörp Schuld sjtortde zes hoezer in[28] en dao kaome dan ouch teentalle luuj um 't laeve. Ouch 't toeristische wiensjtedje Altenahr waor boetegewoon hel getroffe. In de sjtad Sinzig verdronke twelf beweunersj van e tehoes veur zjwaor gehandicapte.[28] Ouch hie haet 't water väöl sja aangeriech aan de infrastructuur. Zeve brögke van de sjpaorlien Remagen-Adenau (Ahrtalbahn) waore ingesjtort. Waeg waore neet miè begaonbaar en dat bemeujlekde de hölpverlièning in dit gebeed.

De distrikte Bitburg-Prüm, Vulkaneifel en Trier-Saarburg woorte oetgerope tot rampgebeed. De reveerkes en baeksjkes in de Südeifel bereikde rónd 15 juli hun hoagste sjtand.[29] In Kordel, get ten noorde van Trier, woort e bejaardehoes óntruump.[30]

In Rienland-Palts zin 141 doaje te betreure. Miè es 700 luuj raakde gewónd, doezende luuj zin daakloos en nog zeve luuj were vermis.[31]

't BelsjBewirk

 
Ravaasj in 't sjtedje Pepinster nao de euversjtruiming van de Vesder en de Hoëgne

Op 't Belsj waor veural de provincie Luuk hel getroffe door 't noadweer van 14 en 15 juli. Op 24 juli woorte deile van de provincies Name en Waals-Brabant getroffe door heftige regeval.[32]

De regemetersj van de Service Publique de Wallonie - Mobilité et Infrastructures (SPW MI) registreerde de volgende neersjlaagwieväölhede euver 'n periode van 48 oer: Jalhay 271,5 mm (271,5 liter per veerkante meter), in Spa 217,1 mm, Neu-Hattlich 189,0 mm en Mont Rigi kórtbie Weismes 192,4 mm. Dat zint oetzónderlek groate wieväölhede neersjlaag.[33] Hièl hel getroffe waor 't sjtruimgebeed van de Vesder mit de plaatse Verviers, Pepinster en Chaudfontaine. Dao vele rilletief väöl sjlachoffersj en woorte väöl hoezer besjadig. Waeg waore neet miè begaonbaar en väöl luuj móste dagelank op hölp wachte.[34]

In deile van Wallonië woort 't treinverkièr sjtilgelag. E gedeilte van 't sjpoor tösje Èèsjde en Luuk waor eweggesjpeuld.[11]

Op 't Belsj haet 't hoagwater 41 miensjelaeves geëis en veur zoawied bekind were nog twiè luuj vermis.[35]

BrónneBewirk

Op de pazjena July 2021 floods in Europe van Wikimedia Commons zeen media gerelateerd aan dit óngerwerp te vènje
  1. 1,0 1,1 1,2 Het regent nu harder in Zuid-Limburg door klimaatverandering KNMI, 15 juli 2021
  2. Teruglezen: Wateroverlast in Limburg. Sandra Horrichs en Frits van Otterdijk - 1limburg, 13 juli 2021
  3. KNMI beëindigt code rood in Limburg. 1limburg, 15 juli 2021
  4. Extreme regenval: gevolg van warmere lucht en traag bewegende buien H20 Netwerk, 16 juli 2021
  5. Website Watersjap Aa en Maas
  6. Dijkdoorbraak bij Hattem, geen gevaar voor mensen en huizen. NOS, 20 juli 2021
  7. LIVE: Code Oranje voor zware regenval in Zuid-Limburg. Sandra Horrichs en Frits van Otterdijk - 1limburg, d'r 13e juli 2021
  8. A76 bij Simpelveld dicht wegens water op de weg. De Limburger, 14 juli 2021
  9. A2 bij Meerssen in beide richtingen dicht vanwege overstromingsgevaar. De Limburger, 15 juli 2021
  10. Wateroverlast Limburg: A79 onder water, mensen gered uit boerderij. NOS, 13 juli 2021
  11. 11,0 11,1 Waterschade: reparaties Eijsden en geen treinen naar België. Chantalle Donné - 1limburg, 19 juli 2021
  12. Wateroverlast: Bewoners Gosewijnstraat worden geëvacueerd door leger. Fons Winteraeken - TV Valkenburg, 15 juli 2021
  13. Wateroverlast in Valkenburg alsmaar heviger, bewoners worden geëvacueerd. Nu.nl, 15 juli 2021
  14. Puinruimen in Valkenburg: museum blijft maanden gesloten. Arthur Hubers - 1limburg, 17 juli 2021
  15. Dodental België opgelopen tot 37, nog zes vermisten. NRC Handelsblad (blog), 22 juli 2021
  16. Veiligheidsregio: Aantal gebieden in Zuid-Limburg staan vannacht onder water. Nu.nl, 15 juli 2021
  17. Midden-Limburg maakt zich op voor extreem hoogwater. Maura Laarman - 1limburg, 16 juli 2021
  18. Bewoners Bunde en Geulle terug naar huis: ‘Uithuilen, puin ruimen en opnieuw beginnen’. Rob Cobben - De Limburger, 17 juli 2021
  19. Venlo begint evacuatie laaggelegen delen: 10.700 mensen. Arthur Hubers - 1limburg, 16 juli 2021
  20. Teruglezen: Spannende uurtjes in Well, bewaking dijken. 1limburg, 17 juli 2021
  21. "Mehrere Tote" nach Haus-Einstürzen in Erftstadt-Blessem. WDR, 16 juli 2021
  22. Dammbruch verhindert – wie ist die aktuelle Lage? Südwest Presse, 19 juli 2021
  23. Merkel verspricht schnelle Hilfe für Unwetteropfer - Besuch in Bad Münstereifel. Christian Wolf, WDR - 20 juli 2021
  24. Zwei Menschen sterben in überflutetem Keller. Aachener Nachrichten, 15 juli 2021
  25. Weitere Dammbrüche in Wassenberg nicht auszuschließen. Rheinische Post, 18 juli 2021
  26. Entwarnung nach Evakuierung in Leichlingen-Büscherhöfen. Radio Berg, 20 juli 2021
  27. In Hochwassergebieten drohen neue Gewitter. Tagesschau, 22 juli 2021
  28. 28,0 28,1 Hochwasser-Live-Blog in RLP: Aktuelle Entwicklungen im Überblick. SWR, 15 juli 2021
  29. Flusspegel von Prüm, Nims und Sauer brechen reihenweise alte Rekorde. Trierer Volksfreund, 15 juli 2021
  30. Website Landkreis Trier-Saarburg
  31. Website van Rienland-Palts
  32. Wéér chaos in België: modderstromen trekken door Dinant, auto’s drijven mee. De Limburger, 24 juli 2021
  33. 271 mm de pluie à Jalhay sur 48 heures, plus du double de la normale!. Sudinfo.be - 16 juli 2021
  34. Dit is nu de stand van zaken in Limburg, Oost-België en West-Duitsland. Nu.nl, 16 juli 2021
  35. Inondations: le bilan passe à 41 morts et 2 disparus. Le Soir, 27 juli 2021