De Fryske Marren

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Gemeinte De Fryske Marren (De Friese Meren)
Provincie	Friesland
Hoofplaats	Joure
Börgemeister (lies)	Arie Aalberts (CDA)
Opperflaakde – daovan water	559,93 km² 198,10 km²
Inwoeners – deechde:	51.229 (1-5-2014) 142/km²

De Fryske Marren is 'n fusiegemeinte in de Nederlandse provincie Friesland, die per 1 jannewarie 2014 is oontstande oet de opgelufde gemeintes Gaasterland-Sloten (Gaasterlân-Sleat), Lemsterland, Scharsterland (Skarsterlân) en e klei stökske vaan Boornsterhem (Boarnsterhim). De Friese naom is sinds 1 juli 2015 officieel.

Kerne

De gemeinte besteit oet väöl tientalle kerne: Akmarijp (Eakmaryp), Bakhuizen (Bakhuzen), Balk, Bantega (Bantegea), Boornzwaag (Boarnsweach), Broek (De Broek), Delfstrahuizen (Dolsterhuzen), Dijken (Diken), Doniaga (Dunegea), Echten (Ychten), Echtenerbrug (Ychtenbrêge), Eesterga/Follega (Jistergea/Follegea), Elahuizen (Ealahuzen), Goingarijp (Goiïngaryp), Harich, Haskerhorne (Haskerhoarne), Idskenshuizen (Jiskenshuzen), Joure (De Jouwer, hoofplaots), Kolderwolde (Kolderwâlde), Langweer (Langwar), Legemeer (Legemar), Lemmer (De Lemmer), Mirns (Murns), Nijehaske, Nijemirdum (Nijemardum), Oldeouwer (Alde Ouwer), Oosterzee (Eastersee), Oudega (Aldegea), Oudemirdum (Aldemardum), Rijs (Riis), Rohel (Reahel), Rotstergaast, Rotsterhaule, Rottum, Ruigahuizen (Rûgehuzen), Scharsterbrug (Skarsterbrêge), Sint Nicolaasga (Sint Nyk), Sintjohannesga (Sintjânsgea), Sloten (Sleat), Snikzwaag (Sniksweach), Sondel, Terhorne (Terherne), Terkaple, Teroele, Tjerkgaast (Tsjerkgaast), Velingsoord (Velingsoard) en Wijckel (Wikel).

In Lemsterland en Scharsterland waore de Nederlandse naome officieel (zeker, oondaanks tot Scharsterland officieel 'ne Friese naom had). Boornsterhem en Gaasterland-Sloten hantere evels de Fries plaotsnaome; in de ierste gemeinte waore de plaotsnaomsjèlder zelfs eintaoleg Fries. De Friese plaotsnaome oet die gemeintes zien heibove vet cursief gedrök.

Insignes

De gemeinte De Fryske Marren dreug (sinds 6 jannewarie 2015) e waope wat ziech zoe liet umsjrieve:

Golvend doorsnoje: I. in goud 'ne springenden haos vaan keel (roed); II. in lazuur (blauw) 'ne rieksappel vaan goud. 't Sjèld gedèk mèt 'n gouwe kroen vaan drei blaajer en twie kier drei perele.

D'n haos kaom veur in de waopes vaan zoewel Haskerland es Gaasterland, gemeintes die in 1984 opgónge in respectievelek Scharsterland en Gaasterland-Sloten. Ouch die waopes hadde deen haos weer. De rieksappel kump veur in de waopes vaan Lemsterland (umhoeg) en Doniawerstal (umlieg). Dees lèste gemeinte góng in 1984 in Scharsterland op, welke gemeinte neve de geneumden haos ouch dee rieksappel droog. Mèt de sumpel combinatie die 't waope vaan De Friese Meren beit, zien alle aw bestuurseinhede op Sloten nao vertrooje.

't Veendel is gebaseerd op de kleure en symbole vaan 't waope. De gemeinte zelf, die dit symbool op 17 december 2014 vaslag, gief evels symbolische invölling draon: blauw steit veur de mere, geel veur de hoegergelege zandgrun en wit veur de 'weidse loch'. De springenden haos weurt es symbool vaan vrijheid geïnterpreteerd.

Politiek

Op 13 november 2013 woorte veur de nui gemeinte verkezinge gehawwe, mèt de volgenden oetslaag:

Partij	Stumme	Percint	Zedele
FNP	5883	28,45%	9
CDA	4823	23,32%	8
PvdA	2555	12,35%	4
VVD	2333	11,28%	3
D66	1393	6,74%	2
CU	1183	5,72%	2
NCPN	1174	5,68%	1
GL	743	3,59%	1
NPP	595	2,88%	1

De opkoms bedroog 52,01%.

De gemeinte weurt bestuurd door 'n coalitie vaan FNP en CDA. Dees coalitie heet oonder mie beslote um de naom te goon verandere in De Fryske Marren. E deil vaan de bevolking is ziech daotege goon verzètte, neet in 't minste um de koste die dat weer mèt zouw bringe. Per 1 juni 2015 is de naom officieel veranderd.

Externe link

• Website vaan de gemeinte