Krawbich

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Klummesj, es te dit dialek sjpriks.

---

Krawbich (Nederlands: Craubeek) ies 'n gehuch dat huèrt bie en liek aan de voot van 't hoaggelege Klumme. Saer 1982 liek 't in de gemeinte Voelender (Zuud-Limburg). Ouwer sjriefwies zint: C(k)roubeek en C(k)raubach. De naam verwies nao 'n (druèg)beek en 'n del mèt brónne (Zevesjprunk). 't Dal van Krawbich vörmp de grens van 'n plateau dat riek ies aan krietlaoge in de grónd. Dat kriet sjteit bekènd es Kundersjtein. De luuj oet de buurt, die dizze helle kalksjtein oetkapde neumde dat de Krawberger. Dao weurt ouch kalk van gemaak. Ein van de kalkbrennerieje hèt 't Awvermennekeslook.

Bokhaof in Krawbich 2005

'n Veurbeeld van 'ne boew van de plaatselike sjtein ies de carrévörmige Bokhaof mèt eine trapgevel. Veur deze haof, op 'ne driesjprunk, sjteit 'n iezere waegkruus oet 1879. Op 'n ander houte waegkruus in 'ne holle waeg sjteit gesjreve: "Ouch vuer dich". Miedde in de buurtsjap bevingk ziech 'n Mariakapel van Krawberger sjtein mèt 'n leie tentdaak en 'n mini-klokkedeekske op de tuup.

In de buurt, in 't veld, liek 't ièwenoud good Kaardemich (Kaardenbeek), 'ne haof dae al geneump weurt in de 13e ièw. Bergop, riechting Termoorsj en Ranzel, bevingk ziech de Veurderhaof.