Guillaume Cornelis Beverloo
Dit artikel is gesjreve (of begós) in 't Gelaens. Laes hie wie v'r mit de versjillende saorte Limburgs ómgaon.
.png)
Guillaume Cornelis Beverloo, baeter bekènd es Corneille (Luuk, 3 juli 1922 - Villers-Adam?, 5 september 2010) waas 'ne Nederlandse kunsjilder.
Corneille is de verfransing van ziene tweëde veurnaam Cornelis en is ouch Frans veur 'kraoj' , ein van zien geleefde vogelthema's in zien werk.
Biografie bewirk
Corneille woort gebaore in Luuk es kèndj van Nederlandse awwesj. Es 17-jaorige verhoesde hae nao Haarlem en in 1940 nao Amsterdam, wo hae, hoewaal hae groatedeils autodidact waas, van 1940 pès 1943 sjtudeerde aan de Kunstnijverheidssjoal en 'ne cursus teikene en etse volgde aan de Rieksacademie veur beeldende Kunste. In 1946 heel hae in Groninge zien eësjte expezisie.
Aanvankelik waas hae sjterk beïnvloed door 't werk van Picasso, mèr in 1948 maakde hae zich hiejvan los en trooj hae toe tot de Nederlandse Experimentele Groep, later de Cobra-bewaeging geneump; hae is daovan mede-oprichter, same mèt ónger angere Karel Appel, Anton Rooskens, Jan Nieuwenhuys en daene ziene broor Constant Nieuwenhuys.
In 1950 verhoesde hae van Amsterdam nao Paries. Daonao reisde hae meërmaole nao anger deile van de waereld: Noord-Afrika, Noord-Amerika, de Antille en Zuud-Amerika. Dees reize bepaole in hoag mate de aard van zien werk. Lyrische transposities in ein werm en genuanceerd coloriet drökke zien sjpontaan emoties oet. Vanaaf 1960 veel hae trök op figuratieve kuns, wobiej vrouwluuj, vögel, blome en dèks ouch personages tot zien artistiek vocabularium beheuëre.
Corneille bleek medio 2005 nog aeve wirklöstig es vreuger, ouch al woort gezag dat hae "depressief" zouw zeen. [1].
Zelf bewaert hae dat sjildere geine hobby of werk is, mèr eërder ein roping. De lèste jaore haaj Corneille zien atelier in Paries en woonde hae in ’t dörpke Villers-Adam. Bezeukesj woorte bekand neet toegelaote door de kunstenaer.
In 2006 is ein recordbedrag betaald van € 215.000 veur 'n sjilderie van Corneille.
Hae maakde de lètste jaore 'ne meujlike tied door; hae verbleef kènnelik in 'n inrichting en woort (volges ein door zien echgenote aevel taengegesjpraoke berich) ónger curatele gesjtèld door zien vrouw en ziene zoon, ómdat hae 't geldj verkwanzeld zouw höbbe, veroarzaak door 'n bipolaire sjtoarnis. Corneille zien vrunj en zien galeriehouwesj bewaere aevel dat zien gezin häöm haet laote opsjlute ómdat ze geldj wolle. In juni 2007 liek hae d'r weer baove-op te zeen; hae waas perseuënlik aanwezig biej de äöpening van 'n tentoansjtèlling in 't CoBrA-museum in Amstelveen.
In 2008 woort 'n kwestie ómtrent de auteursrechte op zien werk óngerwerp van ein civiel gesjil veur de rechbank in Amsterdam. Dao-in góng 't mèt name óm de vraog of Corneille leej aan ein geisteskrankheit op 't mement dat hae de rechte op zien werk euverdroog en of dees euverdrach daodoor vernetigbaar waas, en in hoewiet eventueel door zien wederpartiej ein beroop op 't vertroewesbeginsel meugelik is, doordat 'n achteraaf gesjtèld wilsgebrek dan neet waas opgemerk. In dit gesjil is op 10 september 2008 ein eësjte vonnis geweze.
In 2010 sjtorf hae op 88-jäörige laeftied in Frankriek. Op ziene wunsj weurt hae begrave in Auvers-sur-Oise (effe bove Paries), vlakbie de graver van Vincent en Theo van Gogh.
Werke bewirk
Zien kunswerk Au sein de désert, il y a encore de la place pour les yeux (1949) haet biej 'n veiling in 2006 in Kopenhage € 281.000 opgebrach. Nog noats is veur ein van zien werke ein dergelik hoag bedraag betaald.
Corneille haet ouch laevesgroate sculpture gemaak. Zien werk 'Le Bateau de L'espoir' woort in 1993 verkoch veur HFL 70.000 en is taengewoordig 'n völvoud van dit bedraag waert.
Óngersjeijinge bewirk
- Commandeur in de Orde van de Nederlandse Leeuw
Externe links bewirk
Referentie bewirk
- ↑ Corneille is zwaar depressief, aldus 'n kort berich in 't Algemeen Dagblad op 10 juni 2005, pag.17. Hae zouw volges dat berich "behandeld waere" en "volges geruchte" zouw zien vrouw hum "onder curatele" höbbe laote sjtelle, mer zie sjprook det volges 't zelfde berich taege. Corneille's appartement in Amsterdam zouw zien "leeggehaald" en hae haat "enkele rechszake loupe euver 't auteursrecht op zien werk".