Cor Deneer

Dit artikel is gesjreve (of begós) in 't Toears. Laes hie wie v'r mit de versjillende saorte Limburgs ómgaon.

Cor Deneer is 'ne dichter in 't Limburgs en 'ne sjriever-dichter in 't Nederlands. Hae is gebore in Wèssem 18 augustus 1917 en gesjtorve in Vinlo op 15 november 1976.

Eige werk

Zigeunerkoor [1944] Nederlands poëzie
Verloren Jaren [1946] Nederlands proza
Twintig verzen voor twee gulden Nederlands poëzie [eige beheer]
Losse gedichte in Wèssems dialek: Capriccio Italien [1940]
Bohème [januari 1940]
Weegeleedje achter ’t front [april 1940]
Drinkleedje [november 1940]
Media Vita

Vief dialekgedichter van Cor Deneer zint: Capriccio Italien, Bohème, Weegeleedje achter ’t front, Drinkleedje en Media Vita.

Uuever Cor Deneer

In weemoed en in wijn (Walther Hermans, Vinlo 1977)

Nederlands poëzie

De herfst trok dieper het land in (Walther Hermans, Math Geenen e.a., Vinlo 1993) Nederlands proza en poëzie

Biografie

Cor waas de aodste oet ein gezin van elf kinjer. Zien vader waas poskentoearhaojer in Wèssem. Nao de lieëger sjoeal dao ging hae nao ’t gymnasium in Remunj. Studeerdje wiejer ane universiteit van Leuve inne politieke en sociale wetesjappe. Róndje dees studie summa cum laude nao d’n oearlog aaf. Wirkdje in den oearlog ieës op ’t distributie-kentoear in Häör, waerdje later hoof van de distributiedeens in Berge. Zoeat in ’t verzèt en doeak ónger in Den Haag van 1943-1945. Sjreef uuever zien belaevenisse in dae tied ónger pseudoniem Tom van Dijk ziene roman Verloren Jaren. Trouwdje in 1946 mèt Leen Caris oet Häör en wirkdje es redactiechef bie ein drökkerie-oetgaeverie in Utrech. Op 1 november 1946 trooj d’r in deens es chef-redactie bie ’t Dagblad voor Noord-Limburg. Hae verbreidje zien kènnis op väöl terreine door zelfstudie in de aovesore. Sjreef dèks gelaegeheidsgedichter in zien gezèt. Zien sociale betrokkeheid en sjrieverstalent kwoeame toet oetdrökking in ziene ‘s zaoterdigse column De Zesde Dag. Hae waas de kroeanprins van hoofredacteur Bertels, mer toen deze mèt pensioen ging en d’r eine noewe beneumdj mós waere, goof de katholieke Raod van Commissarisse de vuuerkäör aan emes anges. Cor Deneer veuldje zich gepasseerdj; bleef nog ein paar jaor aan en stapdje begin sevetiger jaore uuever nao de redactie van ’t waekblad E3 Journaal. In augustus 1976 trof hum ein zwaor zeekdje, woea-aan hae op 15 november 1976 is gestorve

De mins Cor Deneer

Cor waas eine Maaskentjer dae heel vanne netuur en zien dörp ane Maas. Hae waas geluivig en kèndje ziene invoudige kóm-aaf: stil en besjeie deej d’r zien werk. Doe mójjes hum neet te väöl lestig valle op en mèt zien werk. Hae heel van meziek, van eine lach en ein traon en oppe tied van ein good glaas. Hae kós baeter loestere es kalle en haaj daoróm altied gaer kómpenie óm zich haer. Waas adjudant bie vastelaoves- vereiniging Jocus in Vinlo en spuueldje dèkker tenieël. Waas geworteldj in ’t culturele laeve dao en in zien eige Wèssem. Hae kreeg den ouch neet vuuer niks in 1969 de Noord-Limburgse Cultuurpries. Es journalist/sjriever beoefendje hae alle genres. Jo Wijnen bestumpeldje hum es ein “journalistiek genie” en typeerdje hum mèt: “Het waas mieë maondigmörge es vriedigaovendj bie Cor”. Jan Laugs numtj zien sjrieve: “Goudieërlik, wies en weemoedig, hertelik en vol humor”. Hae haet zien talente noeat aan ein groeater publiek aangeboeaje. Pas nao ziene doead höbbe gooj vrinj zien gedichter nog ins gebundeldj en oetgegaeve.

Thematiek

Es se de gedichter van Cor Deneer leus, kumtj ein thema sterk boeavedrieve: de doead. Väöl van zien Nederlandstalige gedichter gaon uuever de herfs en verwieze nao de kómmendje wintjer - de doead. Ze höbbe verwantjsjap mèt ’t werk van J.C. Bloem, Hendrik Marsman of mèt Gerrit Achterberg sjrieftj Walter de Bruijn in zijn inleiing bie In weemoed en in wijn. Hae duit dinke aan eine angere Limburgse dichter: Paul van der Goor.