Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Clublogo op 't stadion.
Almere City FC is 'n betaolvoetbalclub oet de Nederlandse stad Almere, die in 't sezoen 2023/24 oetkump in de Ieredevisie. De club woort in 1993 opgeriech es FC Omniworld en in 2010 umgeduip, meh heet al 'n väöl laanger historie achter ziech; deils boete Almere. De club späölt häör toesmatches in 't Yanmar Stadion, deil van 't Sportpark Tussen de Vaarten.
De wortele vaan de club ligke bij de Amsterdamse profclub BVC Amsterdam in 1954. In 1958 góng die club same mèt DWS tot DWSA (wat later zelf weer in FC Amsterdam opgóng). Fans vaan BVC riechde toen in 1959 'n nui club op, De Zwarte Schapen (de sjelnaom en daovaandan ouch geuzenaom vaan BVC; noe nog ummer de bijnaom vaan Almere City). Deze club bleef tientalle jaore in Diemen, later Amsterdam voetballe, sinds 1978 same mèt A.V.V. Argonaut in de vörm vaan A.Z.S. en tösse 1988 en 1992 daobij oonder de naom FC Sloterplas.
E royemint vaan e haaf jaor door de KNVB woort de club bekaans fataol; in 1993 waore nog mer wieneg leie gebleve. In Almere wouw de politiek evels gere 'n Hoofklasseclub; de Zwarte Schapen kóste nao dees stad touw koume. Hei begós de club in 1995; sinds 2000 oonder de naom FC Omniworld, nao de omnisportvereineging die de gemeinte aon 't opriechte waor en boevaan de voetbalclub deil mós goon oetmake.[1] Ouch waor 't de bedoeling tot de club op termijn nao 't betaold voetbal mós; get wat in deen tied neet door sportief prestaties meh allein door e solide, door de KNVB goodgekäörd zakeplan kós weure bereik.
In 2001 woort de Omniworld Sport BV opgeriech, meh de euverwinning vaan Leefbaar Almere in 2002 brach 't perces tot stèlstand. Dees partij waor tegen 't opzètte vaan betaold voetbal mèt belastingsgeld. De partij góng mètbesture en 't plan woort aofgebloze. Noe perbeerde de club mèt privaot geld in de Ierste Devisie te koume. Oetindelek lökde dat in 2005.
De ierste jaore haolde de club wieneg sportief succes; dèks indegde ze op de allerlèste plaots. In 2010 woort de club opgekoch door mieljardair en supporter Lesley Bamberger. Um mèt 't verleie te breke besloot de club ziech 'ne nuie naom en e dito imago aon te mete; ze woort herneump in Almere City FC. Ouch noe gónge de prestaties neet umhoeg; in 2011 oontkaom ze zelfs mer zjus aon degradatie nao de Topklas doortot concurrent RBC Roosendaal failliet góng.
Vaanaof sezoen 2014/15 góng 't beter: de club sjoot umhoeg nao 't middestök vaan de competitie en deeg zelfs mèt aon de naocompetitie. In 2022/23 promoveerde Almere City FC, mèt traineur Alex Pastoor en assistent Hedwiges Maduro, via de naocompetitie nao de Ieredevisie.
Mèt de opriechting vaan de bvo in 2005 woort de amateurtak aofgesplits. De amateurs degen 't nog e tiedsje good in de Hoofklas, meh degradeerde in 2010. Bij de naomsverandering vaan de profs veranderde ouch hunne naom nao Almere City. In 2011 góng de club evels failliet; de leie riechde dao-op de nui club Sporting Almere op.
