Yuri van Gelder
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Yuri van Gelder (Waalwijk, 20 april 1983) is 'ne Nederlandse turner dee z'n specialiteit de ring zien.
Yuri begós op vijfjäörege leeftied mèt turne; heer woort in 1992 veur 't iers Nederlands kampioen in zien leeftiedsklasse, en vief jaor later woort heer veur 't iers in de nationaol selectie opgenómme. Heer braok door in 2000, wie heer mèt ziene nuien trainer Remi Lens op 't Europees kampioonsjap 'n brónze medalje haolde.
In 2003 won heer veur 't iers 'ne wereldbekerwedstried. Daonao volgde de successe de ein de ander op. In 2005 woort heer in 't Hongaars Debrecen Europees kampioon. De top vaan zien carrièr tot noe touw behoolt heer op 26 november 2005 in Melbourne, Australië, wie heer wereldkampioon op de ring woort. Daomèt woort 'r d'n ierste Nederlandse wereldkampioon turne sinds Henricus Thijssen in 1903 op 't peerd zoe'nen titel behaolde.
De jaore dao-op góng de carrièr vaan Van Gelder op en neer. Heer haolde noets mie zien gooj rizzeltaote vaan 2005, en woort in 2009 zelfs gesjors um 't gebruuk vaan cocaïne. Nao 'n aofkicktrajek góng heer weer aon sport doen. In 2016 plaotsde heer ziech veur 't iers veur de Olympische Speule. Heer kaom de kwalificatie door en moch nao de finaal um de medajes. Wie heer op 8 augustus evels deep in de nach zaat toeskaom vaan 'n nach oetgoon in Rio de Janeiro, besloot 't NOC, op veurspraok vaan zienen trainer, häöm te sjorse en nao hoes te sjikke.
In 't daogeleks leve is Van Gelder militair.