Cocaïne

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Cocaïne, coke, wit of sos is 'n saort aan harddrugs dae wuuert verkregen oete blajer vanne cocaplantj; 't is e stimulerendj middel det behuuert toete alkaloïde.

In pure vorm haet cocaïne e sterk opwèkkendj effèk. Gebroekers vergaete de zörg en höbben innerzjie veur te dansen en te drinke, mer 't gebroek kan ouch leie toet zaenechtigheid en ónras. Liefelike gevolge zeen 'ne verhuuegdjen hertslaag, zweite en verwiedje pupille. Mit hoger dosisse kónne de blooddrök enne lieftemperatuur waere verhuueg. 't Wuuert gebroek in 't oetgaon, mit naam gesnaove. Richtig verslaafdje gebroeke meis crack, waat is opgesjuuendj mit ammonium en wuuert gerouk. Boeten 't recreatief gebroek wuuert 't ouch gebroek door luuj die groeate prestaasjes mótte levere.

Gebroek van cocaïne kan leie toet verslaving door 't effèk waat 't haet op 't beluueningssysteem vanne herre; me kan al nao kort gebroek verslaaf waere. Kóntinu gebroek kan wiejer ernstige gevolgen höbbe veure gezóndjheid; 't vergruuetj de kans op slaeg, hertinfarkte, lóngklachte (in 't val van rouke), bloodvergiftiging en hertstilstandj. Ouch kan me zich chronisch meug gaon veulen en minder of gei plezeer mieë gaon ervare.