Geweustrao

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Klummesj, es te dit dialek sjpriks.

---

Geweustrao (Nederlands: Weustenrade) ies 'n gehuch dat huèrt bie de vreuger gemeinte Klumme. Saer 1982 ies dat de gemeinte Voelender in Zuud Limburg.

Baekapel

De naam geit truuk nao woeste ontginning. Rade beteikent: gerooide plek. Dao sjtoon óngevaer 70 hoezer. De buurtsjap liek miedde in de velder aan de Luiperbeek, die 'n paar kilomaeter wiejer in de Gelaenbaek zal oetmonde. Op die beek drièjde in vreuger jaore 'n oliemeule. In Geweustrao sjteit 'n baekapel mèt 'n gezjwenkde tuupgevel en 'n klökske op 't daak um te loewe. 't Gebuuwke ies opgetrokke van baksjtein, op de heuk verseerd mèt mergelblokke. Wiejer bevinge ziech nog 'n paar waegkruzer op de sjplietsinge van waeg.
Aan de waeg nao Ten Esje sjteit 'ne gesjlote haof in gedeiltelik kundersjtein (veurgevel), baksjtein (paortgevel) en mergel (ziegevel) opgetrokke.

Literatuur

Carréhaof in Geweustrao

Hub van der Maar, pseudoniem van Huub Delahaye oet Termaar haet e book gesjreve de Reuze va Weusterich, in 1972, woa-in hae in 'n combinatie van fictie en non-fictie 't leve van dees gemeinsjap en dat van de buurt besjrief. 't Verhaol fungeert es 'ne truukbliek nao de Limburgse volkscultuur van de 20e ièw.