Vlèètege

Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Vlèètegs, es te dit dialek sjpriks.

---

Vlèètege (örges aanders ouch Vlietege; Nederlands: Vlijtingen, Frans: Flétange, Waols: Flétindje) is e dörp in Belsj Limbörg en e deilgemeinte vaan Riems. Bij de deilgemeinte Vlèètege, die in 2005 2521 inwoeners had, huurt ouch 't gehuch Laofelt. Vlèètege ligk in Druug Haspegouw en heet 't bijbehurend typisch heuvellandsjap. Vlèètege ligk noordelek vaan Riems-dörp, oostelek vaan Gröet-Spaan en westelek vaan Kesselt.

Albanuskèrk in Vlèètege

Wit kapelke

't Straotbeeld weurt gedómmeneerd door de neoclassicistische Albanuskèrk (torie oet 1840, kèrk oet 1846; zuug de foto). Zuielek vaan d'n dörpskern vint me 't wit kapelke, gewijd aon Maria. De Maer, 't vreuger merretplein, góng in d'n twintegsten iew verlore, zoe good wie de windmeule vaan 't dörp (gesloop in 1992).

Historie

In 't dörp zien archeologische voondste gedoon oet de steintied, d'n iezertied en de Romeinsen tied. 't Dörp es zoedaoneg kaom in 1079 es Fle(y)tingen es ierste op sjrif, en in 1139 nog ins es Fletingis, in 'n sjinkingsakte oet naom vaan d'n Duitse keizer, dee 't dörp al ieder (in d'n èlfden iew) in lien had gegeve aon 't kapittel vaan de Sintervaoskèrk in Mestreech. Daomèt kaom 't dörp es 'n enclaaf boete 't graofsjap Loen te ligke. In 1747 woort Vlèètege, in de Slaag bij Laofeld, gooddeils platgebrend. In 1934 kaom 't Albertkenaal neve 't dörp te ligke. Sinds 1977 maak Vlèètege deil oet vaan de fusiegemeinte Riems.

Bronne

Dit artikel is gebaseerd op, meh neet vertaold oet, 't corresponderend Nederlandstaoleg artikel; wijer deende ouch dees paasj es bron.