Velociraptor

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Velociraptor ("snelle grieper") is 'n oetgestorve genus van therapode dinosauriërs det veur zoea 75 toet 71 miljoen trögk laefdje tiejes 't litste deil van 't Kriet. Twieë saorte waeren óngersjeie: Velociraptor mongoliensis, de typesaort wovan de fossiele zeen óntdèk in Mongolië; en Velociraptor osmolskae, waat woort aafgelèdj oet sjeielreste die me haw óntdèk in Binne-Mongolië.

Velociraptor waas klènder es anger dinosauriërs oete femielje vanne Dromaeosauridae, wie Deinonychus en Achillobator, mer anatomisch gezeen lieke de saorte väöl opein. 't Bieës waas twieëveutig, gevaerdj, carnivoor en haw 'ne lange stert en 'n lang, zekelvörmige klaw aan ederen achterpoeat, die d'r wersjienlik broekdje veure proeaj aan te valle. Me kan Velociraptor óngersjeie vanne anger Dromaeosauridae door ziene lange, lieëge sjeiel enne bek dae nao baove wies.

Velociraptor is ei vanne dinosauriërgeslechte die 't alderbekandjste is; det kump veur e groeat deil dore filmrits Jurassic Park, wo d'r aevel verkieërdj wuuertj oetgeteikendj, namelik sónger vaeren en grótter es det t'r daodwirkelik waas. Ouch inne paleontologie guldj t'r es e wichtig geslech, aangezeen oetzunjerlik väöl skelètte zeen gevónje.

Vaeredèk

Fossiele van veurgengers vanne Velociraptor dujen al op vaeregreuj. Hiedoor nome paleontologen aan det Velociraptor ouch e vaeredèk mós höbbe gadj, aangezeen neet-vlegendje veugel ouch häör vaeren höbbe behaje. In 2007 óntdèkdje weitesjappers in Mongolië vaerknuupkes ane veurerm van e fossiel, die aanwieze wo de vaeren aan 't lief höbbe vasgezaete. Dit waas 't ieëste kónkrieët bewies det Velociraptor ouch vaere mót höbbe gadj.