Vèsserswaert

Dit artikel is gesjreve (of begós) in 't Illekaoves. Laes hie wie v'r mit de versjillende saorte Limburgs ómgaon.

---

Vèsserswaert is e gehuch aan de Maas in de Nederlandjse gemeinte in de Nederlandjse gemeinte Ech-Zöstere. Tót 1803 waas 't 'n hieërlikheid.

Vèsserswaert vool in de Middelieëwe ónger 't graafsjap Loon en behuuerdje tót in de negetieëndje ieëw kirkelik ónger de parochie Ieële. De hieërlikheid Vèsserswaert waas 'ne lieën van Valkeberg. In 1607 verkóchte aartshertog Albrech en zien vrouw Isabella van Sjpanje de hoag jurisdictie euver Vèsserswaert aan Jean Curtius.

In de zèstieëndje ieëw praekdje Menno Simons in Vèsserswaert. In dees plaats höbbe gerumen tied väöl anabaptiste gewóndj.

Vanaaf 1803 vool de veurmaolige hieërlikheid ónger de gemeinte Ieële.

Doe in 1839 't Belsj en Nederlandj woorte gesjeie, woorte de gebiede op de rechsje Maaskantj e deil van Nederlandj. Ieële kwaam in 't Belsj te ligke, mer Vèsserswaert en d'n Daniëlsweerd woorte bie de Nederlandjse gemeinte Roostere geveug. Kirkelik góng Vèsserswaert aevel ónger Buchte huuere. In 2001 góng de gemeinte Roostere op in de fusiegemeinte Ech-Zöstere, wo door saer den Vèsserswaert ónger die gemeinte vèltj.