Daarde Devisie
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Daarde Devisie is e niveau vaan 't Nederlands voetbal. Um perceis te zien is 't 't veerde niveau vaan de Nederlandse voetbalpiramide, oonder de Twiede Devisie en bove de Veerde Devisie. Ze besteit oet twie competities, 'n Daarde Devisie Zaoterdag en 'n Daarde Devisie Zondag. Bei competities bestoon oet 18 teams. 't Geit officieel um amateurclubs, meh mèt 'n vrij groete maot vaan professionalisatie (e paar contrakspeulers, späölgeld en winspremies, bedriefsveuring, groete aontalle supporters etc.). De Daarde Devisie daorum ouch welins es semiprofdevisie umsjreve.
Historie
bewirkDe Daarde Devisie is in principe nui veur 't sezoen 2016/17, meh kump voort oet de Topklas. Die waor pas in 2010 opgeriech, mèt es doel 'n brögk te sloon tösse 't betaold voetbal en 't amateurvoetbal. Clubs móste noe door sportief prestaties kinne promovere nao de profcompetitie, wat iers neet meugelek waor. Umtot 't mer twie Topklasse gaof, tegeneuver zès Hoofklasse, mós dat de concurrentie verbetere (allein de bèste clubs tegenein).
In de praktijk bleek evels 't look nao de Ierste Devisie nog te groet, veural wat betröf de eise die aon de bedriefsveuring en de accomodatie (beveurbeeld stadions vaan minstens 3.000 plaotse) woorte gestèld). Daorum besloot me veur nog e niveau in te stèlle. Dit woort de Twiede Devisie. Dao-in zouwe de zeve bèste teams oet de twie Topklasse vaan 't sezoen 2015/16 instruime, plus veer belofte-èlftalle. Oet 't restant vaan de Topklasse zouw de Daarde Devisie weure gemaak, aongevöld mèt drei belofteteams per competitie en de bèste Hoofklasseteams. Door de oetdunninge vaan 2010 en 2016 gief 't vaanaof 't sezoen 2016/17 nog mer veer Hoofklasse in plaots vaan de traditioneel zès.
'n Daarde Devisie heet 't in Nederland veur 2016 neet gegeve, in tegestèlling tot de Twiede Devisie, die tösse 1956 en 1971 ouch al bestoont.
Kampioene
bewirkDe volgende clubs zien kampioen gewore vaan de Topklas daan wel Daarde Devisie. In de Topklas-jaore woort um 't gans amateurkampioensjap gespäöld tösse de kampioene vaan de zaoterdag- en de zondagcompetitie. Me kós daomèt promotie nao de Ierste Devisie aofdwinge, meh dao woort gemeinelek gei gebruuk vaan gemaak; 't speule um 't amateurkampioensjap waor veural 'n traditie die in de Hoofklas al bestoont. In de Daarde Devisie is dat neet mie nujeg: allebei de kampioene promovere en de grens tösse amateur- en profvoetbal is neet zoe sjerp mie. De amateurkampioene zien hei-oonder vet gezat.
| Sezoen | Zaoterdag | Zondag |
|---|---|---|
| 2010/11 | IJsselmeervogels | FC Oss |
| 2011/12 | SV Spakenburg | Achilles '29 |
| 2012/13 | VV Katwijk | Achilles '29 |
| 2013/14 | SV Spakenburg | AFC |
| 2014/15 | Kozakken Boys | FC Lienden |
| 2015/16 | Excelsior Maassluis | FC Lienden |
| 2016/17 | IJsselmeervogels | ASV De Dijk |
| 2017/18 | SV Spakenburg | Joonk Vitesse |
| 2018/19 | VV Noordwijk | Joonk Volendam |
| 2019/20 | gein kampioene door COVID-19 | |
| 2020/21 | ||
| 2021/22 | FC Lisse | OFC |
| 2022/23 | ||
Limbörgse teams
bewirkIn de Daarde Devisie vaan 2022/23 kump ein Limbörgse club oet: RKSV Groene Ster oet Heerle. Ouch EVV oet Ech heet jaore drin gespäöld, en daoveur al in de Topklasse, meh degradeerde in 2022 nao de Veerde Devisie.