Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Amateurvoetbal is voetbal gespäöld door lui die dit neet beroopsmaoteg doen, in tegestèlling tot betaold voetbal of profvoetbal. De term is zinvol gewore naotot ziech mèt en mèt betaolde voetbalclubs oontwikkelde - in Ingeland al roond 1900, op 't Europees vasteland nao d'n Twiede Wereldoorlog. Umtot amateurs allein hunne vrijen tied aon traine en speule kinne besteie, höbbe ze minder sjans um hun talente te oontwikkele. Daoboete struime allewijl de groetste voetbaltalente wel door nao 't profvoetbal. Heidoor steit 't amateurvoetbal op e minder hoeg sportief niveau es 't profvoetbal. Soms speule binne profclubs speulers op amateurbasis. Wienie 'n voetbalclub 'ne speuler in deiltied betaolt, sprik me vaan 'ne semi-prof.

't Niveau vaan amateurteams versjèlt sterk. In de mieste voetballen gief 't oetgebreide competities, verdeild in versjèllende divisies (zoegeneumde voetbalpiramide). In de hoeger divisies weurt 't voetballe zier serieus genome, weurt väöl getraind, semi-professioneel begeleid en premie oetbetaold aon speulers. Zoe'n clubs höbbe 'n begroeting vaan hoonderddoezende of zelfs mieljoene euro's (wat in de buurt vaan 'n klein profclub kump) en 'n eige stadion um de groeten aonhaank (soms doezende lui) kwiet te kinne. Clubs oet lieger divisies höbbe gein stadion (soms ein tribune) en zien väöl minder professioneel opgezat. Wijer höbbe amateurclubs altied wel reserve-èlftalle, die in apaarte competities speule ('ne vörm vaan breiddesport), en versjèllende jäögteams. Zeker de lieger amateurclubs zien in hoeg maote aofhenkelek vaan vrijwèllegers - dèks de voetballende leie of hun femilie - die de speulers mote traine, sjeids- of grensrechter mote zien of 't materiaol behiere. Amateurvoetbal weurt neet ummer op lendelek niveau gespäöld; euver 't algemein zien de lieger devisies beperk tot ein regio. Dit kump umtot echte amateurs minder tied höbbe um te reize, meh veural umtot op de lieger niveaus mie clubs zien, die neet per se gans 't land door hove te trèkke um ziech mèt gelieke te mete.

Maandervoetbal bewirk

In Nederland gief 't op dit memint ach niveaus amateurvoetbal. Typisch veur Nederland is de sjeiing tösse zaoterdag- en zondagvoetbal, boebij de ierste vörm is gestiech veur orthodox-protestantse clubs die neet op zondag wouwe speule. Allein in de hoegste amateurdevisie, de Twiede Devisie, speule zaoterdag- en zoondagclubs doorein. Dao-oonder gief 't twie Daarde Devisies (ein veur de zaoterdag, ein veur de zondag), dao-oonder veer Hoofklasse (twie veur de zaoterdag, twie veur de zondag) en daan de Ierste t/m de Vijfde klasse, die beperk zien tot ein vaan de zès KNVB-distrikte. Limbörgse clubs koume oet in distrik Zuid II; in dit distrik gief 't allein zondagvoetbal.

In Nederland is 't lesteg veur 'n amateurclub um te promovere nao 't betaold voetbal. Tot 't sezoen 2009/10 waor dat oonmeugelek en ouch daonao bleek 't zier lesteg um clubs zoe wied te kriege. In 2009 woort de Topklas opgeriech um dat gedoon te kriege; 't versjèl bleek evels nog te groet. Sinds de opriechting vaan de Twiede en Daarde Devisie in 2016 (in 't geval vaan de Twiede Devisie 'n heropriechting) is promotie en degradatie tösse 't amateur- en profvoetbal verpliech.

Op 't Belsj gief 't ouch twie klasse profvoetbal mèt dao-oonder amateurvoetbal. Vreuger woort de hoegste amateurdevisie de Daarde Klas geneump. Sinds 't sezoen 2016/17 is de nomenclatuur aanders. De twie profdevisies heite Ierste Klas A en B, um sponsorreies bekind es Jupiler League resp. Proximus League. Dao-oonder steit de Ierste Klas amateurs, 'n lendeleke competitie mèt 16 clubs. Dao weer oonder zien de Twiede en Daarde Klas amateurs, die zien opgesplits in drei resp. veer regionaol competities. Dao nog weer oonder is 't voetbal provinciaol georganiseerd, volgens de nege aw provincies vaan 't vreuger unitair Belsj.

Vrouwevoetbal bewirk

In 't vrouwevoetbal goon minder groete bedraoge um; in väöl len is daorum al 't vrouwevoetbal nog amateurvoetbal. Zoe neet in Nederland, boe sinds 2007 'n Ieredevisie veur vrouwlui besteit. Hei-in speule veural teams vaan kapitaolkrachtege profclubs. Gans aanders is dat bij de amateurs: de mechtegste clubs mèt vrouweaofdeiling höbbe ziech väölal dao-in gespecialiseerd en zien es maanderclub vaan väöl minder beteikenis. Recordmeister is SV Saestum oet Zeist; de bèste club oet Limbörg is Fortuna '54. Me späölt bij de amateurs op veer niveaus, vaan Topklas euver Hoofklas en Ierste Klas t/m de Twiede Klas. Vrouwevoetbal weurt in Nederland sinds 1955 in competitieverband gespäöld, meh heet pas de lèste jaore aondach weite te trèkke.

Nederland en Belsj dege vaan 2012 tot 2015 same in de BeNe Women's League, meh in 't sezoen 2015/16 is die neet vaan start gegaange. Sindsdeen is 't hoegste niveau in 't Belsj weer wie vreuger de Ierste Klas. Dao-oonder gief 't nog 'n Twiede en Daarde Klas. De sport weurt rillatief kort, sinds 1971, in officieel competitieverband gedoon.

Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Amateurvoetbal&oldid=414499"