Tevere

Dit artikel is gesjreve in 't Heëlesj. Ómdat 't plaatsgebónge is, maogs doe 't ómzètte nao 't Teverener, es te dit dialek sjpriks.

---

Tevere (Duutsj: Teveren) is e dörp i g'n gemingde Jellekerke dat huët bei Kreis Hinsberg in 't weste va g'ne Dütsjen bóndssjtaat Noardrien-Wesfale. 't Op 80 bis 105 meter hoeëg ligkend dörp hat op 30 november 2012 2.326 lüj. Tevere ligk drei kilometer zuudwestelig va g'n sjtad Jellekerke zelver aa d'r L42. De Roeë Baak, die plaatsjelig mit Teverener Bach weëd aageduud, sjtruimt noardoeëstelig van 't dörp, um richting de Gelingbaak aaf te watere. Tevere sjtóng al vanaaf 1155 bekank as (De) Tivern. 't Woar i de herfs van 1944 zjwieër bekamp. 't Reveerke d'r Worm woar toen vuur e paar daag 'n frontlinie tusje de Dütsje en de geallieerde unger leiding va de Verenigde Sjtate. De Britte boewde in 1953 bei Tevere e lóchmachbasis, die in 1968 i heng kam va de (noakrieëgse) Luftwaffe.

Uëverzichskaat va Tevere en Nuitevere

Zich op Tevere.

De lüj va Tevere zint traditioneel gooddeels lutheraans-protestants, dewiel vöal anger dörper i g'n umgeëving kathelike inwuënesj hant. Vanaaf d'r zestieënden ieëw hat zich een protestants-christelige gemingde gevestig, die sjteets mieë wasjte. Dit zörgde doavuur dat in 1993 'n twieëde parochie (gemingde) geboewd mós woeëde. De protestantse kirk hat i g'n gemingde Jellekerke zoeën 4.500 lede, oeëva e groeët deel i Tevere. 't Dörp hat óch economische beteëkenis vuur de direkte umgeëving. Get westelig van 't dörp, aa g'n grens mit de Nederlandse provincie Limburg, ligk 't netuurgebeed Teverener Heide.