Tetrafobie
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Tetrafobie is angs veur de nómmer 4. 't Is 'n bijgeluif wat veural veurkump in Oos-Aziatische len wie China, Japan, Korea, en Taiwan.[1]
't Chinees woord veur veer (四, pinyin: sì, jyutping: sei3), versjèlt, umtot 't zjus wie Limburgs 'n toentaol is, allein mer qua toen van 't woord veur doed (死, pinyin: sǐ, jyutping: sei2), in versjèllende vörm vaan gesproke Chinees. In de karakters, m.a.w. 't gesjreve Chinees, is 't versjèl in betekenis, aanders es in 't Limburgs, wel dudelek ziechbaar. 't Zelfde geld veur de Sino-Japanse en Sino-Koreaanse wäörd veur veer, shi (Japans) en sa (사, Koreaans).
Tijdes feestdaog moot me oplètte mèt 't gebruuk vaan de nómmer 4. Ouch es 'n femilielid kraank is, zeker in de Chinese cultuur. Zelfs 't gebruuk vaan de nómmers 14, 24, etc. moot weure vermijd vanwege de aonwezegheid vaan nómmer 4 in dees nómmers. In dees len weure dees nómmers ouch dèks euvergeslage bij aonduidinge vaan verdepinge in gebouwe, zoewel in hotèls, kentoere, apparteminte es hospitaole. Taofelnómmers 4, 14, 24, etc. weure dèks euvergeslage bij houweleksdiners en aander bie-einkomste in dees len. In väöl woencomplexe weurt blok 4, 14, 24 etc. miestal vervaange door blok 3A, 13A, 23A, etc.
In Hong Kong weurt in sommege apparteminte wie Vision City[2] and The Arch[3] alle verdepinge vaan 40 tot 49 euvergeslage. Oonmiddelek nao 39/F kump 50/F, boedoor sommege lui die neet wete wat tetrafobie is goon dinke tot 'n aontal verdepinge neet besteit.
De Chineze laote dit ouch zien door aonduidinge veur militare vleegmesjiene te beginne mèt de nómmer 5, zoewie 't gevechsvleegmesjien "Shenyang J-5". Op dezelfde meneer gebruke de Taiwanese en de Zuid-Koreaanse marine de nómmer 4 neet bij aonduidinge vaan hun sjepe.
In stei boe de Oos-Asiatische en Westerse cultuur samekoume, zoewie Hong Kong en Singapore, is 't meugelek tot in sommege gebouwe zoewel 13 es 14 weure euverslage es verdepingsnómmer same mèt alle verdepinge boe 'n 4 in veurkump.
In Korea is tetrafobie väöl minder extreem, mer de verdepingsnómmer 4 weurt bijnao altied euvergeslage in hospitaole en aander publieke gebouwe. In aander gebouwe weurt de veerde verdeping soms aongeduid mèt "F" (Four) in lifte. Appartemintnómmers die mierdere kiere de nómmer 4 zouwe kriege (zoewie 404) weure miestal neet gebruuk umtot dat de weerde vaan de woening negatief zou beinvleuje
Zuuch ouch
bewirk- Nómmers in de Chinese cultuur
- Daartiende verdeping
- Triskaidekafobie (de angs veur de nómmer 13)
References
bewirk- ↑ Havil, Julian (2007). Nonplussed: Mathematical Proof of Implausible Ideas (Hardcover). Princeton University Press, 153. ISBN 0691120560.
- ↑ Opmerkinge bij de plattegroond vaan Vision City
- ↑ Plattegroond vaan The Arch