Nedersaksisch

't Nedersaksisch is de volkstaol vaan 't groetste deil vaan Oos-Nederland en vaan hiel Noord-Duitsland. Vaanajds weurt 't ouch in Pole en in Rössische kolonies gesproke, meh zeker in Pole is de taol bekaans oetgestorve. In Duitsland steit 't oonder de naom Plattdüütsch bekind, in Nederland weurt meistaol denao verweze mèt de naome vaan de versjèllende streiktaole. De naom Nedersaksisch is boete de taolkunde nog neet zoe ingebörgerd.

Verspreiing

't Nedersaksisch taolgebeed begint in Gelderland: de Betuwe, Nijmege en Arnem zien nog Frankischtaoleg, meh vaanaof de oostelike Veluwe en de Achterhook begint 't Saksich. De provincies Euveriesel, Drente en Greuninge zien hielemaol Saksich, 't zuidweste vaan Friesland (de Stellingwerve) ouch. In dat gebeed woene oongeveer drei miljoen minse, boevaan nao sjatting 1.800.000 minse Nedersaksich praote. De ciefers vaan 't Duitse Nedersaksisch zien neet bekind.