Smolensk
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
Smolensk (Rössisch: Смоленск, spreek oet: Smal-JENSK) is 'n Wes-Russische stad aon de rivier de Dnjepr. Ze is de hoofstad vaan 't Smolensk Oblas, in 't Centraol Fidderaol Distrik. In 2010 had zie 326.861 inwoeners. Daomèt waor ze de 54e stad vaan 't land. Mèt 'n oppervlaak vaan 166,35 veerkante kilometer heet zie 'n bevolkingsdeechte vaan 1.965 lui de veerkante kilometer.
Smolensk is ein vaan de ajdste stei vaan 't land. 't Woort veur de ierste kier geneump in 836 en waor veur lange tied de hoofplaots vaan häören eige staot. De ikkenemie bleujde op in de stad umtot zie gunsteg gelege laog aon de Dnjepr, rillatief neet wied vaan Moskou (get mie es 400 kilometer). In deen tied is Smolensk mierdere kiere ingenome gewore door Tatare. De lèste kier tot dit gebäörde bleef d'r neet väöl euver vaan de stad. In 1237 woort 't deil vaan Litouwe. De Moskoviete vereuverde de stad in 1340. De stad woort weer Litouws in 1408, Moskoviet in 1514, Pools in 1611 nao 'n twinteg maonde lange slaag, en oetindelek woort zie Russisch in 1654. 't Gaof twie groete gevechte in de moderne historie vaan Smolensk. De ierste waor de Franse inval oonder Napoleon in 1812 en de twiede waor de Duitse oonder Adolf Hitler tösse 1941 en 1943. Es 'n teike vaan respek restaureerde de Sovjet-Unie de stad bekans in zien gehiel. Dat waor taomelek zeldzaom in de Sovjettied, veural es me kiek wie rillatief nauwkeureg 't centrum vaan de stad weer is herbouwd door de Sovjets. Daodoor is Smolensk ein van de wienege industrieel stei in Rusland mèt 'n sjoen aw binnestad.
Brónne
bewirk- Ingelstaolege Wikipedia en Lonely Planet: Russia & Belarus (Veerde editie), p. 322