Sikhisme

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

't Sikhisme (Punjabi: ਸਿੱਖੀ Sikhi) is 'n monotheïstische godsdeens die ane begin vanne zèstieëndjen ieëf is óntstangen in naordelik India doren ieëste lieërmeister Goeroe Nanak Dev. 't Is 'n ónaafhenkelik geluif en gein sameveuging van hindoeïsme en islam, wie 't sómtieds wuuertj gedach. De meiste aanhengers woeanen innen Indiasen deilstaot Punjab; hie woeane zoeaget 21 miljoen vanne 26 miljoen aanhengers van 't sikhisme (sikhs of sikhe). Ouch guuef 't sikhgemeinsjappen in Maleisië, Singapore, Oeas-Afrika, 't Vereinig Keuninkriek, de Vereinigdje Staote en Canada.

't Sikhisme woort geïnspireerdj op 't óngerrich vanne tieën goeroes: wichtige religieus óngerwiezers en praekers. 't Sikhisme geitj oet van eine God, geliekheid, rechvaerdigheid en vrieheid veur edereine. De religie duitj e beroop op zien volgelinge óm e laeve van disciplien, hel wirke, leefdaodigheid en meditatie te leie. Ze accepteertj 't bestaon van alle geluiven en tolereertj gein beveuroeardeiling of óngerdrökking op gróndj van godsdeens, kaste, hoedskluuer, geluifsbeliejenis, ras en geslech.

De doctriene zeen vasgelag inne Goeroe Granth Sahib, 't heilig book veure sikhs. De stifter ennen ieëste goeroe waas Goeroe Nanak (1469-1539). Goeroe Nanak stifdje 't geluif inne vieftieëndjen ieëf mit zien ideologie det alle luuj geliek zeen, 'n óngerdeil vörme van 't Goddelik leech en d'n alderhoeagste (spirituele) staot kónne bereike door same te smultje oftewaal op te gaon innen einen Almechtige God.

't Waord "sikh" is aafgelèdj gewaord van sikkha oet 't Pali of śiṣya in 't Sanskriet; bei meine discipel. De meining hèltj verbandj mit 't feit det sikhe discipele zeen vanne tieën goeroes.

Goeroes

De Tieën Goeroes

't Sikhisme woort gevestig door tieën goeroes (lieërmeisters), die laefdje tösse 1469 en 1708. Dees lieërmeisters waren intellectuele die es houfènj 't geistelik en moreel waalzeen vanne massa hawwe. Edere goeroe veugdje principes en praktiek toe aan waat door zien veurgengers woort óngerweze. Dit móndje oet in 't vörmgaeve vanne godsdeens. Goeroe Nanak waas d'n ieëste goeroe en Goeroe Gobind Singh de litste. Veurder Goeroe Gobind Singh stórf, verklaordje d'r det Sri Goeroe Granth Sahib, 't heilig book, d'n oetènjeliken en definitieve sikhgoeroe waas.

De tieën goeroes ware:

Nr.	Naam	Goeroe gewaoren op	Gebaore	Gestórve	Laeftied	Vader	Moder
1	Goeroe Nanak	15 april 1469	15 april 1469	22 september 1539	69	Mehta Kalu	Mata Tripta
2	Goeroe Angad	7 september 1539	31 mieërt 1504	29 mieërt 1552	48	Baba Pheru	Mata Ramo
3	Goeroe Amar Das	25 mieërt 1552	5 mei 1479	1 september 1574	95	Tej Bhan Bhalla	Bakht Kaur
4	Goeroe Ram Das	29 augustus 1574	24 september 1534	1 september 1581	47	Baba Hari Das	Mata Daya Kaur
5	Goeroe Arjan	28 augustus 1581	15 april 1563	30 mei 1606	43	Goeroe Ram Das	Mata Bhani
6	Goeroe Hargobind	30 mei 1606	19 juni 1595	3 mieërt 1644	49	Goeroe Arjan	Mata Ganga
7	Goeroe Har Rai	28 fibberwarie 1644	26 fibberwarie 1630	6 oktoeaber 1661	31	Baba Gurditta	Mata Nihal Kaur
8	Goeroe Har Krisjan	6 oktoeaber 1661	7 juli 1656	30 mieërt 1664	8	Goeroe Har Rai	Mata Krishan Kaur
9	Goeroe Tegh Bahadur	20 mieërt 1665	1 april 1621	11 november 1675	54	Goeroe Hargobind	Mata Nanki
10	Goeroe Gobind Singh	11 november 1675	22 december 1666	6 oktoeaber 1708	42	Goeroe Tegh Bahadur	Mata Gujri

Goeroe Granth Sahib

d'n Tieëndje goeroe, Goeroe Gobind Singh Ji, waas de litste miensjelike goeroe. Hae haet in 1708 de Goeroe Granth Sahib beneump toete permanente goeroe vanne sikhe. Hae reep de sikhe op de Goeroe Granth Sahib te ieëren es 't lief en geis vanne tieën goeroes.

De Goeroe Granth Sahib of Ādi Granth is mieër es allein 'n heilig book veure sikhe. 't Is d'n èllefdjen en definitieve goeroe vanne sikhe. Daoveur tuuenen aanhengers van 't geluif 'ne groeate ieërbeej veur 't book. 't Book haet ouch de centraal positie bieje sikhistische plaats van verieëring, genaamp de gurdwara. 't Heilig gesjrif steitj op e dominant platform inne wichtigste zaal vanne gurdwara en wuuertj tiejes de deens mit groeaten ieërbeej en waerdigheid op 'n troean geplaats.

De Ādi Granth bevatj bao 6000 hymnes die dore ieëste vief goeroes woorte samegestèldj: Nānak (974), Aṅgad (62), Amar Dās (907), Rām Dās (679) en Arjun (2218). Daonaeve bevatj de Ādi Granth hymnes vanne heilige Bhakta enne Ṣūfīs-moslims (in 't biezunjer Ravidāss, Kabīr en Farīd Khān).