Rosa Parks
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Rosa Louise Parks-McCauley (4 februari 1913 - 24 oktober 2005), beter bekènd es Rosa Parks, waor 'n Amerikaanse börgerrechteactiviste. Ze ies veural bekènd gewore doordat ze in 1955 weigerde um häör zietplaats in 'n bus aaf te sjtoon aan 'ne blanke.
Parks woort gebore in Tuskegee, Alabama. Ze wèrkde 't groatste deil van häör leve es niejeersj. In 't begin van de jaore '50 woort ze actief in de Amerikaanse börgerrechtebewaeging. Ze wèrkde ouch es secretares veur de National Association for the Advancement of Colored People in Montgomery. Op 1 december 1955 weigerde ze häör zietplaats in de bus aaf te sjtoon en achterin te goon ziette, wie dat door de wèt in Alabama veurgesjreve woort. De politie woort debie gehaold en Parks kreeg 'n boete van $10. Wie ze ouch weigerde die te betale, woort ze gearresteerd en veur de rechter gebrach vanwege versjtuèring van de openbaar orde.
Wie Martin Luther King van diet veurval huèrde, begoes hae de "Montgomery bus boycot". Hiedoor góng 't busbedrief bienao failliet en moos me oeteindelik de sjeiing van blanke en zjwarte in de busse aafsjaffe. D'r kaome doe ummer miè proteste tege de segregatie. Óndertösje waor de rechszaak van Rosa Parks bie 't United States Supreme Court terechgekómme. Parks woort dao in 't geliek gesjtèld en de sjeiing tösje blanke en zjwarte woort onconstitutioneel verklaord.
Aan 't begin van de jaore '60 verhuusde Parks nao Detroit, woa ze tot häören doad zou blieve wone. Ze sjtorf op 24 oktober 2005.