Reliekhajer

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

'ne Reliekhajer of reliquaire (Letien: reliquiarium) is e veurwirp veur relikwieje, de reste van hèlge, te beware. 't Kan gaon euver 't ganse skelèt van 'nen hèlge, mer ouch mer e klei deil, de zoea-geneumdje partikele.

Döks is zónnen hajer inne vorm van e sjrien; me neump 'm den e relieksjrien. 'ne Reliekhajer kan hieël besjeie toet gans groeat zeen. De aadste reliekhajers wore meistes buuersje van kosbaar stof mit 'nen draagreem en kwes. De hujige bursa, worin veur en nao de Hèlge Mès de corporale wuuertj bewaardj, is nag dao-aan verwantj, mer haet 'ne veerkantje vorm. In versjillige musea waere nag exemplare bewaardj. 't Stadium det daonao koom waas de reliekbuuers, gemaak van metaal, meistes verguldj zèlver.

Lanksemaan krege de meiste relieksjriene de vorm van klein kirkskes, ieës versierdj mit blaw email, later veural mit väöl góld en bergkristal. 'nen Angere populaire vorm was e sjrien inne vorm van 'n doeas die was bezatj gewaore mit ivoear, in alderhenj aan vörm. Dit waas veural eigen aan klènder relikwieje.

Innen tied det de geluivige d'róm vroge veure relikwieje ouch wirkelik te kónne zeen, kome hajers inne mode die feitelik de veurluipers ware vanne monstrans dae noe nag wuuertj gebroek veur oetstalling van 't Alderhèlgste. Saer daen tied waere klènder relikwieje ouch bewaardj in rónj metale duueskes mit e glaeske d'rveur.