Parkhotel Rooding

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Parkhotel Rooding ies 'n hotel in Valkeberg in Zuud-Limburg. 't Ies gelege tegen 't "Gebösjke" aan de Nerem, langs de weeg naar Oud-Valkeberg. 't Ies besjermp es rieksmonument.

't Hotel woort es Kurhaus Huis ter Geul geboewd in opdrach van de N.V. Maatschappij tot exploitatie van een rust- en herstellingsoord. Pierre Cuypers maaktde 't ontwerp in chaletsjtiel. 't Pand ies van mergel, met helsjteine en houte details. In 1892 kaom 't gereid. Kort nao de eupening kreeg 't hotel bezeuk van keuningin Emma en Wilhelmina.

't Kuuroord bleek neet rendabel te zin. Vanaaf 1911 waor 't geboew in gebruuk es kloaster van de redemptoriste die oet Frankriek waore gevlöch.

In 1939 woort 't complex gegolle door Johan Rooding, dae d'r wir 'n hotel van maakde. Nao de Twiède waereldoorlog woort 't geboew diverse kière verboewd en oetgebreid. In 2002-2003 woort d'r 'ne groate aanboew gerealiseerd mèt e zjwumbad en 'ne sauna.