Oranje Nassau I
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Heëlesj, es te dit dialek sjpriks.
De Oranje Nassau I waor de ièrsjte van de 4 kolemiene van de particulier Oranje Nassaumiene (N.V. Maatschappij tot Exploitatie van Limburgsche Steenkolenmijnen). Dees mien loog in Heerle, neve de sjtasie, op 't terrein woa noe 't CBS gevestig ies.
De Oranje Nassau I waor in productie van 1899 tot 1974. Wie me dees mien wol boewe, houw me 't probleem dat d'r gein meugelikhede waore um de kole te transportere. De Oranje Nassau I woort pas geëupend nao 't gereidkómme van de sjpoorlien Zittert-Heerle, dae d'r op initiatief van Henri Sarolea waor gekómme. De concessie veur de mienboew op dees plaats waor in heng gekómme van de Duutsje familie Honigmann, die de N.V. Maatschappij tot Exploitatie van Limburgsche Steenkolenmijnen opriechde.
De Oranje Nassau I houw twiè sjachte. Later ies d'r 'n driede biegeboewd. In de geboewe van sjach II ies allewiel 't Nederlands Mienmuseum gevestig. Diet geboew ies opgenómme in de "Top 100 der Nederlandse UNESCO-monumenten". De twiè hoag sjouwe van de Oranje Nassau I houwe es biename "Lange Lies" en "Lange Jan". Ze woorte in 1976 gesjloop. De productie van de mien waor 31.978.000 ton.
De Oranje Nassau I waor de lètste mien die toegóng, op 31 december 1974.