Nimba-ottersjaermoes
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De nimba-ottersjaermoes (Letien: Micropotamogale lamottei) is 'n saort aan zougdere vanne tenrekfemielje, die lid is van 't geslech vanne dwergottersjaermuus. Tenreks kan me vinje door 't ganse vastelandj van Afrika en Madagaskar, meh de óngerfemielje vanne ottersjaermuus, spitsmoesechtige bieësjkes, kan me allein vinjen in Afrika t'n zuje vanne Sahara. De nimba-ottersjaermoes is inheimsj inne buurt vanne Nimbaberg, oppe grens van Liberië, Guinee en Ivoearkös, in Wès-Afrika.
De nimba-ottersjaermoes is e bieës mit e klein lief; ze waoge zoeaget 125 g en höbben 'n lingdje van 15 cm toet 22 cm; mitte stert es e kwart toet ei derdje vanne lingdje. Ze waere waal ómsjreven es dwergzieëotters mit 'ne rattestert. De vach is lank en hingk euvere oearen enne ouge en ze vertuuene bao ummer slechs ein kluuer (gebrukelik is broen, meh zwarte en gries ottersjaermuus kump me ouch taenge).
Nimba-ottersjaermuus zeen nechtelike en semiaquatische bieëster. Ze veule zich heim in zaachte bäöm rónjelóm struimbèdder en baekskes. Ze zeen solitair bieëster en gaon allein óm mit saortgenoeate tiejes 't paarsezoen en wen de moder pasgebaore jónge opbringk. 't Breujpetroean vanne nimba-ottersjaermoes is neet good bekèndj, meh me vermeudj det ze polygaam zeen.