Minderheidstaol

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

'n Minderheidstaol of minderheidsspraok is 'n taol gesproke door 'n linguïstische, en meistes ouch ethnische of relizjieuze minderheid in 'n bepaolde polletieke gemeinsjap (meistes 'n gemeinsjap die vertegeweurdeg weurt door 'ne staot). De taol is dus neet streek-geboonde, zoewie de streektaol Limbörgs. In plaots daovaan is 't grópsgeboonde, zoewie 't Jiddisch veur väöl Europese Jäö dat is.

't Europees Handves veur regionaal taole en taole vaan minderhede verpliech Nederland um Jiddisch en Romani te erkènne es minderheidstaole, wijl dat veur Duitsland allein Romani is. De aander taole die de twie len motte erkinne (wie 't Limbörgs in Nederland) zien streektaole, gein minderheidstaole. Belsj heet 't Handves noets oonderteikend umtot de Vlaomse regiering weigerde oet angs tot dit de positie vaan de Nederlandse taol te opziechte vaan 't Frans zou verzwake.

Minderheidstaole en streektaole

't Versjèl tösse 'n minderheidstaol en 'n streektaol is noets gans klaor, umtot lui oet 'n bepaolde streek ziech ouch kinne identificere wie 'n minderheid. 'n Good veurbeeld daovaan is de Koerdische taol in Törkije. Zoe is die taol de streektaol vaan e groet deil vaan Oos-Törkije ('t historisch westelek gedeilte vaan Koerdistan) mer is zie ouch de minderheidstaol vaan de Koerdische minderhede vaan in westelek en zuielek gelege groete Törkse stei (wie Istanboel, Izmir en Ankara).

Minderheidstaole in Limbörg/Euregio

Data vaan welke minderheidstaole weure gesproke in de Limbörge en de Euregio Maos-Rien is lesteg te vinde. Wel is 't klaor welke minderheidstaole d'r weure gesproke in de desbetröffende len (Nederland, Belsj en Duitsland).

Nederland

Neve de officieel landstaole Nederlands en Fries (453.000 sprekers), spreek me hei ouch de streektaole Limbörgs (825.000 sprekers) en Nedersaksisch (oonbekind aontal). De volgende taole zien de groetste minderheidstaole:

Törks (400.000)
Arabisch (220.000)
Berbers (90.000)
Koerdisch (40.000)
Kaapverdisch (20.000)
Vietnamees (16.000)
Papiements (13.000)