Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.


Martin in 2020

Micheál Martin (Turners Cross bij Cork, 1 augustus 1960) is 'nen Ierse politicus, leier vaan de conservatief-liberaole polletieke partij Fianna Fáil[1] sinds 2011 en veurmaolege premier (Taoiseach) vaan Ierland vaan juni 2020 bis december 2022. Daoveur waor Micheál Martin minister vaan Boetelandse Affaires (2008-2011), veur Handel (2004-2008), veur Gezoondheid en Kinder (2000-2004) en veur Educatie en Weitesjap (1997-2000). Allewijl is heer obbenuits minister vaan Boetelandse Affaires en vice-premier.

Heer woort gebore in Cork in 't zuidweste vaan de Ierse Rippebliek. Martin wèrkde in die stad iers es lieraar veurtot heer de polletiek ingóng. In 1985 woort heer verkoze in de gemeinteraod en heer fungeerde es börgemeister vaan Cork vaan 1992 bis 1993. In 1989 woort heer reprizzentant vaan Cork Zuid-Centraol in 't Iers Parlemint (d'n Dáil Éireann): dit is 'ne zedel dee heer bleef behawwe en allewijl nog ummertouw reprizzenteert. Nao de euverwinning vaan Fianna Fáil in de verkiezinge vaan 1997 woort Martin door de nuie premier Bertie Ahern opgenomme in 't kabbinèt. In 2004, gedäörende zienen tied es Minister vaan Gezoondheid, woort Martin bekind veur 't introducere vaan e verbod op 't zwame vaan toubak in alle Iersewèrkruimtes, boedoor Ierland 't ierste land in de ganse wereld woort boe zoe'e soortemint policy woort doorgeveurd. In 2009 waor heer d'n iersten Ierse minister vaan Boetelandse Affaires dee op bezeuk góng in Latien-Amerika - boe-in heer ouch de ierste visite vaan 'nen Ierse polletieker in Cuba aofdeeg.

Heer waor contra 't leiersjap vaan ziene partijgenoet Brian Cowen. Oonder Cowens premiersjap, in jannewarie 2011, stapde Micheál Martin op oet protes. Naotot Cowen zelf opstapde kroog Martin snel de kans um Cowen te vervaange. e Paar weke later, tijes de verkiezinge vaan 2011, verloor Martins partij Fianna Fáil 57 zedele. Dit waor 't zwoerste verlees vaan de partij in häör 85-jaoreg bestaon. Toch moch Martin blieve es leier umtot 't verlees vaan de partij breid woort geïnterpreteerd es sjöld vaan ex-premier Cowen.

Oonder Micheál Martins leiersjap woort Fianna Fáil obbenuits de groetse polletieke partij vaan Ierland nao de verkiezinge vaan 2020. Op 27 juni 2020 woort Martin premier (Taoiseach) vaan Ierland mèt 'n groete coalitie tösse Fianna Fáil, häöre groete Christendemocratische rivaal Fine Gael en de Greune Partij. 't Is nog noets ierder gebäörd tot Fianna Fáil en Fine Gael in ein coalitie zien gegaange. De rillaties tösse de twie partije zien zoedaoneg hoeg tot me d'r euver eins is gewore tot Martin 't premiersjap mot deile mèt de partijleier vaan Fine Gael, Leo Varadkar. Zie wisselde weer vaan premiersjap op 1 december 2022.

Rifferenties bewirk

  1. deil vaan de liberaole Europese polletieke partij Renew Europe, zjus wie de Nederlandse VVD en D66, de Duitse FDP en de Belzje MR en OpenVld
Aafkomstig van Wikipedia, de Vriej Encyclopedie. "https://li.wikipedia.org/w/index.php?title=Micheál_Martin&oldid=462368"