Michail Gorbatsjov
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
Michail Sergejevitsj Gorbatsjov (Róssisch: Михаил Сергеевич Горбачёв; gebaoren op 2 mieërt 1931, gestorven op 30 augustus 2022) waas 'nen invloodrieke Róssische politieker vanne Sovjetunie. Ónger zien politisch leiersjap is 't politiek, sociaal en economisch landjsjap vanne Sovjetunie drastisch verangerdj; de mechtige Communistische Partie vanne Sovjet-Unie die 't landj mieër es seventig jaor mit iezere voes haw regeerdj verloor in zès jaor tied zie gezag en 't landj koom in nuuj politisch en economisch vaarwater terech.
Tiejes zien amb es secretaris-generaal van 't Centraal Committee (1985-1990) en prizzendènt vanne Sovjetunie (1990-1991) introduceerdje d'r twieë nuuj vörm aan beleid"" glasnost ("aopenheid") en perestrojka ("herstrukturering"). Mit glasnost goof Gorbatsjov óngekandje vrieheid van spraeke; perestrojka waas veur 't politisch stèlsel te democratiseren enne burocratische, ónproduktieve economie te verbaetere door vriej mert in te veure.
Dore verangeringe die d'r inveurdje inne Sovjetunie verangerdje de ganse werreld. De supermachsverhajinge versjuufdje naodet de Kaje Krieg aafleep, de waopewèdloup aafbremsdje, de geopolitische kaart van Europa verangerdje door 't oetereinvalle van versjillige lenjer enne val vanne Berliense Moer enne vereiniging van Duutsjlandj. Ónger zienen opvölger, Boris Jeltsin, veel de Sovjetunie oeterein en takeldje 't communisme aaf.
In 1990 kreeg Gorbatsjov de Nobelpries veure Vraej.