Misj

Dit artikel is gesjreve (of begós) in 't Èèsjdes. Laes hie wie v'r mit de versjillende saorte Limburgs ómgaon.

---

Kèrk van Misj in 2005

Misj (Nederlands: Mesch) is 'n dörpke ien de gemejnte Èèsjde-Mergraote (Eijsden-Margraten) geleage aon de Voor. Tot 1943 waor 't ean eage gemejnte. De oêsjkant en de zujtkant grenze aon Belsj. Vreugere benaominge waore Messau, Messchau en 't Waolse Mexhawe en Mehawe. Misj is 't zujdeliksjte dörrep van Nederland. 't Gehuch weert dan aog 't iersj bevrejd op 12 september 1944, (nao de twie weareldoerlog), doer de Old Hickory-divisie van de Amerikane. 'n oerlogsmonuminkt aan de Griezegraaf, neave 't iersj bevrejde café, geaft dat aon. In 't pleutske ligge 131 häöf en hoezer.

Gesjeedenis

De gesjeedenis geat trök nao de Romejnse tied. Op de Sjteinberg zieën graover ongdikt oet dea tied en ien de buurt zieën zelfs prehistorische vuursjtejn gevongde. Misj wurt ien de beuk geneumpt ien 882 es 't aon 't Mariënsjtif ien Aoke wurt gesjonke. Tot 1794 blieft 't dörrep 'n riekshièrlikhead ongder de abt van dizze proosdei. Nao de Franse revellutie wurt Misj eng eage gemejnte tot 1943. Daonao laog 't tot 2011 in de gemejnte Èèsjde.

't Dörp

Ien de 9e ièw sjteit d'r 'n Karolingische kapel, dei ien laotere ièwe oetgebowd zal wurre tot de hujje Hèligge Pancratiuskirrek. Ien de boetemoer is hil âd metselwerrik mit zigzaogendeverben te zieën. Ien de 15e ièw kumpt 'n goeëtisch koar en ien 1888 wurt 't sjieëp verlengkt. Dan kriegt de kirrek aog zing hujje hoege toere. Ien 1969 volg eng restauratie. Binne sjteat 'n hoote beeld van Pancratius mit 'n relikwie.
Op de Voor driejde ièwelang 'n wottermeuële: de Misjermeuële. Ze wurt al genumpt ien de 17e ièw. Sinds de jaore 60 wurt neet mie gemaole. Aonsjleutend likt 'n carréhaof.
De Laathaof dateert oet 1721 meh is wersjeinlik awwer. Ze huurde aog bie 't sjtif oet Aoke. Belasjting mos aon de Laothef betaold wurre en aog rechsjpraok vongkt hie plaots.
Op d'n Drees (d'n Dries) bevingkt zich 'ne groete carrévörmige haof aon 'n sjtraot, die Bourgogne wurt geneumpt.
Op de Sjtejnberg likt de wienplantaasj Sjtejneberg, oe witte wien wurt gemak. De naom heat de plaots te danke aan zinge sjtejn-eatige grongd.

Evenemingte

• De Bronk trikt op de 3e zongdig nao Pinksjtere. Nao aofloop wurt de Cramignon gedanst.
• De kèrmes en de Misjergank vinge plaots op de vuurlitsjte zongdig van augustus. De Misjergank is 'n baevaart nao St. Pancratius.
• Ien december sjteat 't pläötske in 't teake van Kiersmis. Dan is d'r 'n kiersmert en diverse ander activiteite rongd dit fête.

Landsjap

Ien de buurt van Misj is ien de aofgeloope jaore 't Misjer plökbos aongelag (7 ha mit väöl variaotie ien bujm en sjtruuke). De vröchte maoge doer de bezeukers geplök wurre.

Externe link

• www.mesch.nl