Martakert (regio)

Dit artikel is gesjreve (of begós) in 't Tegels. Laes hie wie v'r mit de versjillende saorte Limburgs ómgaon.

Martakert (Armeens: Մարդակերտ; Ջրաբերդ, dzjrabèrd; Azerbeidzjaans: Tərtər) waar 'n provincie (մարզ, marz) in de de-facto Rippebliek Artsach (ouch wel Hoeëg- of Nagorno-Karabach). Det waar 'ne internationaal neet-erkènde sjtaat op 't grónkgebeed van Azerbeidzjan. De provincie had 'n oppervlakde van 1.795 km² en had 20.185 inwoeëners in 2013. Eur huidsjtad waar 't gelieknamige Martakert. De provincie Martakert had 43 gemeintes.

In de regio guuef 't veer groeëte kloeëstercomplexe. Wiejer ligk binne de grenze van de provincie de aaj sjtad Tigranakert, woeë ónger anger arsjeologisch óngerzeuk woort gedaon.

Gesjiedenis

Tösse 1923 en 1991 loog 'n groeët gedeilte van de regio in de Nagorno-Karabachsen Autonomen Oblas (NKAO), 'n autonoom regio binne de grenze van de Azerbeidzjaanse Socialistische Sovjetrepubliek. Etnische Armene ware en zien heej nog altied in de mierderheid en woele zich aafsjeie van de res van Azerbeizjan. In d'n oorlog dae dao-op volgde (1988-1994) waas 't gebeed veur kórten tied in heng van Azerbeidzjaanse troepe, maar in juli 1993 veroverde Armeense milities 't gebeed mèt oetzóndering van de ömgaeving rónkum Maraga, woeë Azerbeidzjane zich e jaor ierder sjöldig hadde gemak aan oorlogsmisdade.

Tiedes 'ne kórten oorlog öm de regio Hoeëg-Karabach in 2020 woorte e paar dörpkes en bergtoppe rónköm de Mrav veroverd door Azerbeidzjaanse troepe. De sjtad Agdam, die boete d'n oeërsjpronkeliken oblas Nagorno-Karabach loog, woort nao 't sjaak-'t-veure truukgegaeve aan Azerbeidzjan. Russische troepe bewaakde saerdeen de res van de provincie en de facto woort dit gebeed tösse 2020 en 't Azerbeidzjaans offensief in 2023 nog altied besjteurd door Armeense separatiste.

Galerie

Zich op 't aad gedeilte van de sjtad Martakert
't Sarsang-sjtuwmaer
't Kloeëstercomplex Gandzasar
Moerreste van de aaj sjtad Tigranakert

Literateur

Denber, Rachel & Goldman, Robert K. Bloodshed in the Caucasus: escalation of the armed conflict in Nagorno Karabakh. New York: Human Rights Watch/Helsinki, 1992
De Waal, Thomas. Black Garden: Armenia and Azerbaijan Through War and Peace. New York: New York University Press, 2003.