Liebik

Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Se-Gietersj, es te dit dialek sjpriks.

---

Liebik (Nederlands: Libeek) ies 'n buurtsjap van Se-Gietere (Sint Geertruid) in de gemeinte Èèsjde-Mergraote op 't plateau in Zuud-Limburg. Ouwer sjriefwies zint: Libec, Libois en Libay (Waalse variante). Liebik grens aan 't Belsj. Dao sjtoon 25 häöf en hoezer.

Vakwerkhoes in Libeek

De buurtsjap ies 'n 13e ièwse sjtiechting. De haof Liebik, Libeek nr. 27, ies 'n groate monumentaal carrévörmige boerderie. De oudste geboewe, van 'n veurmalig kesjtièl, datere oet de 13e ièw. In dae tied waor sjpraoke van 'n börch umgeve door grachte (grave). Die börch waor eigendóm van de adellike familie Van Liebeek. In de 15e ièw haet die ouch eigendómme in Maer. Ein ièw later zal 't gesjlach oetgesjorve zin. Umdat de eigenaere daonao örges andersj woonde, ies 't kesjtièl langzamerhand tot pachhaof gegreujd.
't Woonhoes van mergel, sjtamp oet de 16e en 17e ièw. Sjtel en sjure oet de 18e en 19e ièw.
Eine kilomaeter van de haof liek 'n perceel mèt de naam De zaetel. Deze veldnaam wies nao de plaats of weuning van de Hièr. In 't begin van de 20e ièw zint hie reste gevónge van fundamente en aardewerkfragmente. 't Zouwe reste zin van 'ne houte woontore mèt vakwerk, zoa es die in de Mieddelièwe waal geboewd woorte.

Aan de grens bevingk ziech 'n Gaas-exportsjtation, geboewd in 1966. De exploitatie weurt gedoon door Gasunie.

Folklore

In twiè weekende in juli vinge hoevefièste plaats, op de haof-Libeek, georganiseerd door de fanfaar Sint Gertrudis. 'n Heilige Mès, 'ne folkloristische optoch, 'n boerebroelof zin ónderdeil van 't programma.